無綫（TVB）歌唱比賽《中年好聲音4》戰況愈趨白熱化，惟近日網上突然流傳「內定三甲」的傳聞。今日（22/8）參賽者許美琪出席《中年好聲音4》宣傳活動時，就相關傳聞大方接受《香港01》訪問，開腔回應種種疑慮。

否認內定傳聞　大讚參賽者皆具實力

對於網上傳出節目已有「內定三甲」的名單，許美琪表現得相當坦然，認為這只是外界的猜測。她坦言對評審的眼光非常有信心，並表示：「得分全憑台上發揮。」被問到如何看待內定傳聞，許美琪表示：「嗰啲係網友自己猜測嘅啫，係咪！我哋每一個都有實力嘅，我就唔會話有內定，都係睇評審囉。即係如果佢哋鍾意，係我哋發揮得好嘅，咁其實嗰啲分係真嘅，我唔會話係內定囉。」

有參賽者早接工作拍海報　許美琪：唔會影響比賽意志

對於有指個別參賽者在比賽進行期間已接下工作，甚至爆出「拍攝海報」出騷，外界擔心會否打擊其他參賽者的士氣。對此，許美琪笑言大家只是工作時間安排各有不同，並不會因此感到消沉，對此，她笑着回應：「嗰啲都唔會算係內定嘅，可能早早接咗工作啫，係咪？唔會嘅！我覺得每個人到時都會有工作安排，只不過係比較早或者比較遲啫，我唔會覺得係內定。」

為吳亦偉護航不熟悉廣東話 大讚對方付出加倍努力

除了內定傳聞外，網民亦對吳亦偉唱廣東歌咬字不清晰但獲高分表示不解，甚至質疑評審過於關照。許美琪對此表現得相當體諒，更主動為對手護航，認為大家應該給予努力學習廣東話的參賽者更多鼓勵。

談到評分標準與咬字問題，她說：「佢又唔係本地人，佢又唔識講廣東話，佢其實好努力㗎啦！我都唔係話講慣廣東話啦，但佢係真係冇講過一句㗎，咁其實佢好努力，我反而會畀個『A+』佢。」

面對「黐脷筋」批評不介意　大方接受並承諾改善

提及有部分網民及KOL批評她自己唱歌時亦有「黐脷筋」懶音或咬字不清的問題，問到會否感到被攻擊或不開心？許美琪不僅沒有表現生氣，反指自己並非本地人，說話有瑕疵在所難免，並歡迎大家明確指出是哪個字，讓她能夠進步。

談及網民的批評，她笑言：「其實我唔知『黐脷筋』係咩嚟㗎！係咪懶音之類？因為我係新加坡人，所以如果你哋啲評審同我講呢度唔啱，咁我就會聽囉。但網友如果淨係話我『黐脷筋』，你就話畀我知邊一個字，我起碼會知！可能有啲字我聽起來唔覺，譬如之前有個KOL話『暖』同『暖』，我唔知㗎，我聽返先知：『Oh！原來係咁！』咁我要上網查吓。大家原諒我啦，我又唔係本地人，但如果唱歌比賽，咬字應該要清晰啲嘅。」