陳庭欣回應秘戀失婚老闆 親解相識時間線知道男方已離婚
現年39歲的陳庭欣(Toby)自去年底宣布與拍拖8年的彩豐行老闆楊振源(Benny)分手後,感情去向一直備受關注。近日有報道指她已秘密「封盤」半年,新歡是年約四十多歲的燈飾生意老闆Gary,是 KOFFA LIGHTING 的創辦人,曾負責不少名店的燈光設計。Gary雖不及舊愛楊振源家底厚,但「掹車邊」都可說在上流圈子打混。
有指陳庭欣與Gary因打匹克球(Pickleball)撻着,更稱男方在4、5個月前才辦妥離婚手續。消息更指,Gary今年初曾力追前女團Super Girls成員趙慧珊(Aka),更以公司名義贊助對方舉辦「Aka C. X Koffa」畫展以博取芳心,可惜最終慘食檸檬。
陳庭欣被影到今早現身Gary爸爸的安息禮,並全程陪陪男友在教堂門外送客。對此,陳庭欣今日接受《香港01》電話訪問,她說:「希望佢同佢嘅家人節哀順變。」並親自拆解這段緋聞,全盤否認戀情並直言:「知情人士應該一知半解!」
澄清相識時間線 否認單獨約會
對於報道指她與Gary是今年4月透過打波認識,Toby首度開腔糾正時間線,直指爆料者「一知半解」:「大家對我感情情況好關心,我現在好擔心同人出去食飯會被人寫被人影。知情人士寫話我識Gary係4月開始,其實我哋識咗係未玩Pickleball時已經識,識超過年半,差不多兩年,不是咁寫。」
被問到兩人是否相戀及男方有否展開追求,Toby斬釘截鐵表示雙方只是波友關係:「我哋現在都係好好朋友,大家有共同興趣打波,波友其中一個啫。(追求你?)我哋冇特登去諗,同唔講呢啲喎。」 至於有否私下單獨約會食飯,Toby就笑言生活極度貼地:「通常幾個人打完一齊去食茶餐廳都係咁。」
拒八卦男方離婚 私下聯絡無需道歉
報道中提及Gary剛離婚數月,Toby坦言知道對方的背景,但直言不愛八卦他人私事:「我哋識咗兩年,朋友介紹,係朋友friend,我哋都有傾吓,但後來係個friend話俾我聽,我仲叫佢唔好咁八卦講你friend啲嘢。但你話離婚5個月嗰啲,好似以我記憶中唔係,但都唔係重點。」
緋聞爆出後,Toby透露Pickleball群組的共同朋友已將新聞轉發給他們。被問到有否私下向Gary講聲唔好意思,Toby大方回應:「有聯絡,但冇講唔好意思,佢都知我做呢行,大家知道入面幾多真幾多假。有時啲嘢做藝人,感情事本身好私人,但大家特別有興趣知,明嘅。」 她亦慨嘆報道對圈外人造成影響:「大家知我年紀,入咗行咁耐,已經慣咗,唔怪大家點樣寫,但個標題真係好令人有誤會。而其他人係圈外人,好影響人哋。」
39歲活得精彩 預告大把人約入「孤獨村」
對於目前的感情狀況,Toby大派定心丸,強調絕對沒有其他戀情:「依家都係自己一個,開心!大家可能見到我除Gary外都有其他friend都係男仔,唔係男仔就係女仔啦。」 她續指現階段人生有更多值得專注的事:「其實感情以外,我都有好多其他嘢做,仲有跑步都好努力,人生活到現在39歲,仲有好多其他嘢。感情事係咪唔重要,我又覺得唔係,但緣份,唔使特別追求。」
回復單身依然充滿魅力,Toby坦言身邊不乏追求者與飯局邀約,更幽默自嘲再傳緋聞就會無朋友:「我現在仍是單身,有人追都唔出奇,或唔好話追,可能約多啲我食飯都唔出奇。(Gary包唔包括在內?)總之就唔單止Gary,我都會有其他人約吓,唔係我就嚟孤獨村,冇friend㗎嘞!」