苑瓊丹自爆胸口不適求醫　被勒令入院：醫生要我即刻去睇急症

資深藝人廖啟智和黃樹棠最近先後爆出患上重病，原來苑瓊丹近日也低調入院，令人相當擔憂。苑仔話因為胸口不適，眼見智叔及棠哥病情，令佢有所警惕唔敢掉以輕心馬上求醫：「最近咁多唔好消息，我當然唔敢怠慢，咪走去睇醫生囉，點知醫生話：你應該去睇急症喎！去到急症，急症又話：你要留院喎！就咁我住咗一晚醫院，做晒全身檢查睇下發生左咩事，好在報告只係話我膽固醇偏高，需要食藥。」

苑仔笑謂：「醫生都解釋得幾好笑，佢話啲心血管布滿豬油膏，所以會愈來愈窄，好在及早發現，食藥可以控制，另外我都會注意返均衡飲食同埋做運動！」苑仔並且呼籲大忙人朋友：「忙還忙，都要聆聽下自己身體的反應，病向淺中醫。」

苑仔指早前內地工作時經常會碰到智叔，至於棠哥就好耐無見，當聽到二人罹患重病時感到好難過，覺得藝人生活顛倒食無定時，身體難免會出現毛病，希望二人都能擊退病魔快快康復。