逆天奇案|「鏡粉」馮盈盈太忙冇睇MIRROR演唱會:我係佛系心態

撰文:李婉文
出版:更新:

馮盈盈於周二(11日)出席有份主演的劇集《逆天奇案》的宣傳活動。盈盈近日在綜藝節目《好聲好戲》的配音表現受到讚賞,她表示的確有很多人跟她說有留意節目。她為團隊付出的努力得到觀眾留意而感高興,但在她個人來說,最開心的是有人讚她的咬字有進步,改善了說話有懶音的問題,「因為我呢幾年嚟,一直希望喺呢方面有改進,讀返清楚啲對白畀觀眾聽,大家真係留意到,我開心嘅位係,終於唔使辛苦觀眾,因為一直以嚟,可能好多觀眾嘅聲音都話,聽我講嘢有啲辛苦,因為要睇字幕先聽得明,而家我覺得終於紓解左呢方面嘅壓力啦,唔使下下要留意字幕先明白我講緊啲咩。」

另外,盈盈早前曾在IG出po自認是MIRROR的粉絲,近日MIRROR的演唱會成為熱爆話題,但盈盈就未有去撐場,她說:「我知道都好多藝人去咗睇,亦都好熱鬧,但係只可惜我真係忙於工作,所以去唔到,因為例如劇集出街,我夜晚有開live大家一齊睇電視、睇首播,同埋睇佢哋嘅反應,仲有夜晚我都要上堂,近排學緊唱歌,同埋上緊心理學嘅course,有啲assignment嘅deadline要交,仲有好多宣傳嘅工作要做,所以真係唔好意思。最重要都恭祝佢哋順利舉行,見到反應都好好。」早前MIRROR演唱會一票難求,被問到有沒有份搶飛,盈盈說:「我都係佛系嘅心態嚟嘅,有嘅話就去睇,冇嘅話都唔強求。唔好咁執着就冇乜問題㗎啦,專心做好自己啲嘢好啲。」

早前衛志豪跟一眾藝人上《開心大綜藝》做嘉賓,並在IG限時動態直擊現場情況,但引來網民私訊攻他,直指「好娘」,又send了MIRROR成員Anson Kong和姜濤的照片給他,衛志豪事後嬲爆,在社交平台上載了與該名網民的對話截圖之餘,又打千字文發表感受。盈盈是《開心大綜藝》的主持之一,她表示不會對個別網民的意見有什麼評論或者是介懷對方的說話,「因為我覺得每個人有唔同嘅聲音、主觀意見,同埋感覺,總有一樣嘢係有人buy,有人唔buy,所以我覺得每一個佢哋畀我哋嘅comment,我哋都有留意,但係有留意得嚟又唔會特別放喺心上,要係為咗一個comment刻意做好多改變,我覺得係focus喺自己做緊嘅嘢,做好嘅話,自然會有人睇到同埋認同。」

點擊下圖看更多盈盈的靚相︰

+22

同場加映:馮盈盈獲評判一致好評 出色表現獲劉江激讚:出神入化

+20