【阿爺教堂？】傳李家鼎秘娶新女伴：去婚姻註冊處睇下係咪囉！
撰文：郭敏玲
出版：更新：
在《阿爺廚房》中，鼎爺就有譚玉瑛姐姐做拍檔，而現實中，都好似有個女伴陪鼎爺喎！鼎爺就話朋友咋喎。
鼎爺李家鼎因為《阿爺廚房》大show真功夫，獲得不少網民大力讚賞，人氣隨即急升。今日有傳媒就爆出71歲的鼎爺疑似有「遲來的春天」，秘娶「厚唇版楊思琦」，還有意將自己身上的廚藝，傳授給對方！唔通鼎爺事業愛情兩得意？
《01》記者致電問過鼎爺，不過他就矢口否認，「其實幾年前都講緊啦，我同佢識咗幾年啦，係朋友嚟啫。（聽聞你們秘密結婚喎？）咁你咪去婚姻註冊處睇下有冇囉！」鼎爺對於有傳媒刊登與女性朋友的合照，表示：「我同阿姐都搭膊頭影相啦，好普通啫！」至於有無發展可能？鼎爺說：「天曉得！」
另一邊廂，報道都講到鼎爺前妻施明孤獨地在公園湊孫，鼎爺一貫以淡然風格答道：「咁我同佢都分開咗，呢啲情況我同佢都有。（咁平時有無見面？）梗係有！同一班細路、親戚都會見面嘅，又唔係受難，係咪先。」咁鼎爺現時單身，其實有無想有個伴陪下的時候？佢就話：「希望啦，不過都隨緣啦，我都一把年紀囉，仲追求做咩嘢？（咁如果有呢？）咁我都唔抗拒嘅！」
有傳媒見到鼎爺前妻施明孤獨湊孫，但鼎爺都有湊孫㗎，仲笑得好開心！（微博圖片）
施明與鼎爺雖然分開咗，但都仲會見面。（微博圖片）