鍾舒漫擔心人身安全已報警　直斥陳潔玲精神有問題：佢好似鬼上身

鍾舒漫（Sherman）早前與陳潔玲因合資做防疫產品生意，引發金錢糾紛而鬧上法庭，雖然案件正排期審訊，但日前雙方再度在IG發文隔空互罵，指控對方不是。

今日（8/7），鍾舒漫出席香港開電視節目《30分鐘大放餸》錄影時，接受《香港01》訪問時表示：「其實我同佢拆咗伙之後，我係完全冇搵過佢。我覺得佢而家精神係有啲問題。就好似之前佢封咗我WhatsApp咁，突然間佢又將佢解封，然之後會喺半夜三更傳一堆短訊畀我，跟住又再次封鎖我，我睇咗啲短訊之後覺得佢好似鬼上身。其實我都好擔心自己嘅人身安全，所以將佢之前恐嚇過我嘅留言短訊去咗報警。」