山寨版西遊狂抽無綫水 老外布偉傑扮沙僧:方丈好小器

撰文:陳浩賢
出版:更新:
黃建東用JM Tone說話,而廣告中有「送禮冧高層」及「方丈好小器」等情節。(網上截圖)

《西遊記》拍過無數咁多個版本,張衛健、陳浩民甚至宇宙最強的甄子丹也扮過孫悟空。近日網上流傳一個新版本,孫悟空由黃建東飾…,sorry搞錯,孫悟空是肥到坐不上筋斗雲的陳康健,黃建東扮演豬八戒,而沙僧竟然是無綫的「御用老外」布偉傑,再加上日本女主持阿Rie,3飯低成本拍山寨西遊。

黃建東自薦扮演豬八戒,他表示自己拍片惡搞《PPAP》後,想轉做搞笑路線。(網上截圖)
陳康健飾演孫悟空,肥到坐不上筋斗雲。(網上截圖)
無綫「御用老外」布偉傑,在片中話玉帝仿如方丈,份人好小器。(網上截圖)

片中四師徒取完西經後,日日無所事事,變晒廢青,此時佛祖出現,指他們農曆新年未有為玉帝準備禮物。四人即時嚇到面青,紛紛說「玉帝等於方丈,份人好小器」,又說因為上次二郎神無準備禮物,即時被人調了去婆羅乃。其後佛祖叫他們看看玉帝Facebook,載有不少日本風景相,佛祖更介紹說「睇吓樹冰,冰有冰味」、「睇吓東瀛菊花,靚到呢?」四師徒忍不住糾正佛祖「櫻花嚟喎」,劇本仿如暗串無綫是是旦旦文化。

跟着佛祖送了寶盒給他們,拋下一句「我OT無補水㗎」就閃人了。四師徒打開寶盒,原來是…一份購物清單,四師徒行勻全港,也買不到禮物,最後他們用購物apps,總算是買齊禮物。

由外國人布偉傑講「最憎人中英夾雜」,充滿喜感。(網上截圖)

黃建東接受《香港01》記者訪問,表示今次廣告想玩角色大兜亂,「拍完《PPAP》條片之後,多咗人認識,都想試多啲搞笑嘅嘢,所以今次我自薦做豬八戒。同康健、阿一佢哋一直都識嘅,但就未合作過。」黃建東飾演的豬八戒,最大特色是用JM Tone講對白,如「二郎God」、「玉Emperor」、「游Water」,連外國人阿一都忍不住講句「最憎人中英夾雜講嘢」,黃建東表示:「拍呢個廣告用咗一日時間,喺屯門蝴蝶灣、土瓜灣等地方取景,酬勞算唔錯,本身係有劇本嘅,但我加咗JM Tone去講嘢,呢啲就係我自己創作嘅。」

片中不時出現「方丈好小器」、「送禮冧高層」等情節,是否影射無綫?「嗰啲係劇本有嘅,唔係抽水,我諗唔關事啩?」至於被問到會否跟康健、阿一再合作,他即表示廣告商都諗緊拍Part II,希望有機會再合作。

三師兄弟行勻全港,都買不到送給玉帝的賀年禮物。(網上截圖)

至於扮孫悟空的陳康健,在片中被賊人搶走到日本掃貨的機票錢,兩位師弟即打了他一身,場面搞笑。陳康健表示:「今次嘅孫悟空好反傳統,好似重到飛唔起,經常被人打呀。」至於抽無綫水,他表示:「二次創作嘅嘢,唔會介意啩?」陳康健笑言都會跟建東及阿一傾吓,將來可以一齊拍片及音樂創作。

廣告抽盡無綫水,在片尾陳康健及布偉傑更接受《西張東望》訪問。
你可能感興趣