【Seasun對手】極品港女月儲105% 零支出為買樓:八達通家人增值

撰文:
最後更新日期:

Macy自豪表示自己月儲105%,儲晒整份糧外,還會炒股投資。(網上截圖)

22歲拜金港女Seasun,在宣傳無綫的新節目《有樓萬事足》時,連環爆出金句,「冇樓唔好白撞」、「有樓有高潮」,不但掀起全城熱話,更令Seasun成為最新的負評王,被網民洗版式批評。不過真心講句,今時今日買樓不靠父幹,就只能搵個富二代?原來節目中仲有其他「自食其力」的方法,另一為買樓去到盡既代表Macy,就是全靠死慳爛慳,月儲105%,真係好大決心。

食飯搭車用八達通,而Macy家人負責增值,這是什麼玩法?(網上截圖)

其實點可以月儲105%如此神奇?無他,最簡單莫過於一味靠黐,節目中Macy自爆每個月零支出,她表示「第一樣嘢,擅用身邊資源,八達通亦都係屋企人會支持我嘅,去lunch同朋友食飯咪用八達通嘟,嗰筆錢咪可能轉嫁咗畀屋企人。」原來如此,即是食屋企住屋企,而她行街消費之後,埋單找數這些粗重功夫,當然由男友負責啦。咪住?心水清的網民幫Macy計計數,全份糧儲起都是100%,餘下的5%呢?雖然Macy無畀家用,但就用份糧來炒股,贏輸拉勻平均都有5%進帳,所以話月儲105%完全無難度,大前題是「錢字行先,家人放旁邊」。

Macy出街使費全由男友埋單,慳到過晒火位。(網上截圖)

Macy食屋企住屋企,完全做到零支出。(網上截圖)

不過一家不知一家事,或者Macy媽媽不用女兒畀家用呢?節目會訪問埋Macy媽媽,兩母女當面對質,而Macy媽媽就話:「我唔係好開心,我話:妳做嘢都冇家用畀我,咁自私而去買層樓。」看來Macy媽媽亦不大贊同囡囡的儲錢方法,甚至話囡囡自私,只是Macy一意孤行,無計。在旁的Macy卻為自己行為申辯,她表示「我自己已經係慳得好辛苦,我覺得妳應該畀啲鼓勵支持我。」為了層樓,影響了母女感情,何必呢?或許正是現今的畸形樓市,令年青人衍生出一味為自己打算的「獨家」心態,最終又是土地問題。

Macy媽媽無奈表示女兒冇俾家用好自私,而Macy則覺得媽媽不夠支持自己。(網上截圖)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。