【迷】激突牙肉妹被網民激讚好醜 劉思希:睇到都覺得感動

撰文:
最後更新日期:

呢下近鏡,就係話畀大家知劉思希可以有幾醜!(影片截圖)

見到小紅咁嘅樣,就知道醜都可以醜出新世界。

出身港姐的劉思希自入行6年以來,所演的角色大多都是千金小姐,給觀眾的印象都比較離地。正當差點成為「御用千金小姐」之際,她在TVB新劇《迷》入面飾演來自內地的小紅,返到香港尋找金剛飾演的「克仔」。劉思希在劇中除了滿口鄉音,更以激突牙肉Look示人,有網民睇完即刻表示:「同李笑好(湯盈盈)有得揮!」、「就咁睇,佢真係好醜!」、「佢同金剛真係好襯。」

被人話真係好醜,劉思希第一個反應就係開心:「咁我本身做醜女吖嘛,做得醜即係做到本身角色嘅要求!」能夠醜出新境界,劉思希話因為做醜女完全冇包袱:「有幾可真係會當街撩鼻屎?今次做呢個角色我都放低咗好多,而且真係好好玩,係一個好貼地嘅角色,對我來說是一個挑戰。」醜到有人讚,背後都總有啲代價,劉思希自爆扮醜的辛酸:「初時我戴假牙肉戴到流晒牙血,加上戴住講嘢不停流口水,我好擔心效果會唔好,但好在牙肉有彈性,慢慢都適應咗,最後都搞得掂。」

劉思希除了做醜女做到出神入化之外,有網民更指她與金剛好襯!(網上圖片)

最初劉思希好擔心做內地人,又要扮到激醜,觀眾會接受不到,怕被他們圍插。如今可以逃出「御用千金小姐」之名,但被人讚做到醜的感覺,劉思希會否怕跌另一御用之名,長期都要做醜女?劉思希極爽快表示:「御用就好呀,真係好好玩。有好多醜角都做到好出色,就好似苑瓊丹,佢之前做嘅『低B瓊』、『石榴姐』,做到大家都會記得,而且成為了經典。我覺得一個正常女仔要去變醜,係專業表現嚟。」所以她希望日後有幾醜做到幾醜都冇所謂。

過去6年做的角色都好似不太出眾,如今以「小紅」的角色跑出,劉思希會否覺得扮醜先會有人注意?她坦言:「其實見到網民有反應,都會覺得有種苦盡甘來感覺。係有感動嘅,因為之前每個角色都好努力去做,但出到來效果冇咁好,付出唔成正比係會好Hurt,但今次見到網民有討論小紅,自己睇完留言都有眼濕濕,都好多謝監製。我知道自己演技唔係太好,但我都會繼續努力。」希望劉思希將來會遇到更多好角色吧。

望望下,又真係幾襯咁喎!

劉思希之前都做開千金小姐的角色,早前的《巨輪2》也不例外。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。