杜琪峯旗下戲林高手 製片燈光副導隨時上鏡

撰文:許育民
出版:更新:

由場務出身的林雪,終憑自己努力獲得一份認同。其實由杜琪峯主理的銀河映像,向來有個不明文規定,但凡員工,無論是製片、燈光、劇務還是副導,去到片場,周不時都會身兼兩職,客串一角半色。這關乎杜Sir的創作習慣,因為他喜歡邊創作邊拍,有時靈感到便立即Call齊人開工。正因為玩即興,正規演員的檔期未必遷就到,相反劇組員工無論如何都要長期Stand by,因利成便之下,這批幕後員工紛紛成為另類的「銀河奇兵」。他們個個都熟口熟面,你會講得出在哪套戲哪一幕見過他們,但就是叫不出他們的名字。事實上,他們在戲中都未必有角色名,但這份莫名的親切感,就似跟他們成為老友。

 

洪偉良(肥仔良)

銀河映像的電工,專責燈光。單看身形已覺喜感十足,在《嚦咕嚦咕新年財》中飾演劉青雲手下,睇佢通水俾青雲一幕,就是正!不過首次對他有印象是在《暗戰》,他飾演財務公司經理,被劉德華挾持做人質,但由於華仔塞兩大嚿錢俾佢,令他自動收口。然後在《鎗火》,經典的商場槍戰一幕,假扮清潔工路過,其實他正是殺手。

清潔工的外形,配肥胖的身形,又怎估到在《鎗火》中是一名殺手。
先被劉華挾持,然後上到天台一槍射爆頭,以為死硬,但劉華人品咁好,點會濫殺無辜,其實只係射出顏色彈。(《暗戰》截圖)
劉青雲在《嚦咕嚦咕新年財》以一身Hip Hop造型示人,作為其手下,服飾又點可以太簡約呢?

 

謝魯肆

聽個名就知食呢行飯,至於是否真名就未能證實。他曾經是銀河映像的製片和副導演,最為人記得的演出包括《孤男寡女》中,不苟言笑的高老闆,《嚦咕嚦咕新年財》中跟湯盈盈不斷鬆章俾梁詠琪的臭八婆,還有《每當變幻時》的生果佬。

人品好,牌品自然好,肆哥在《嚦咕嚦咕新年財》中鬆晒章俾Gigi,可惜換來一句臭八婆,好心冇好報。(《嚦咕嚦咕新年財》截圖)
做生果佬最緊要外表夠街坊,肆哥在這方面贏晒。(《每當變幻時》截圖)

 

趙志誠(志誠)

這位朋友好易認,因為佢留有一束比謝天華好睇得多的長髮,而他的角色名通常又跟這把秀髮有關。好似在《PTU》,飾演盧海鵬個仔馬尾,出場不久就被人從背後一刀插死,最精彩是插住把刀自駕去醫院。另外在《黑社會》的角色叫長毛,大Dee哥手下,當大Dee哥落選後,紛紛邀請Long Gun哥同官仔森,封箱上飛鵝山,送俾大Dee哥洩憤。至於其正職,是銀河映像的製片。

志誠哥經常演黑社會角色,戴上黑超加套黑西裝,唔會話唔似。(《黑社會》截圖)
身中一刀仍自駕去醫院,雖最終失救,但正好帶出一份荒誕。(《PTU》截圖)
被沙Sir逼到要坐滴水位,係嬲的。(《PTU》截圖)

 

羅永昌

4位奇兵當中,這位應該最多人認識,他是羅永昌導演,在銀河映像做過剪接、副導演和執行導演,期間又親自執導過《天生一對》、《每當變幻時》和《報應》。離開銀河後,執導過甄子丹主演的《3D冰封俠:重生之門》。昌哥在銀河時間相當長,參與幕前演出特別多,亦特別落力,例如在《文雀》中以女護士造型現身,《黑社會》中更有幕要全裸,講得上為藝術犧牲。

在《黑社會》飾演吹雞哥手下四眼明,要北上帶龍頭棍返港,但中途被同門堵截搶棍。
《文雀》又是杜Sir慢工出細貨之作,足足拍了4年,而戲中他不再是客串,是重要一角。
《奪命金》中,昌哥飾演茶餐廳老闆,跟志誠哥(右二)有過一幕同場。