【心理追兇】賣魚仔演過百次路人甲 方紹聰:我做得最好係呢份工

撰文:
最後更新日期:

方紹聰在昨晚《心理追兇》飾演以為誤殺女友的舜仔,現實中的他和朋友合資洗衣鋪,更要上一樓一揾生意。(網上截圖)

方紹聰在《心理追兇》戲份有4集,是入行7年以來,戲份最多的一次。(網上截圖)

做無綫藝員收入有幾多,不用多說,那些藝訓班出來的,除非家境富裕,否則有份兼職幫補生計是平常事,好像昨晚播出的《心理追兇Mind Hunter》,劇中以為自己誤殺女友的舜仔(方紹聰飾),現實中他已在無綫捱了7年,今次終於在《心》劇有重戲角色,但7年來方紹聰只可以狂做路人甲,收入微簿,年多前和朋友合資經營洗衣店,為了搵生意,方紹聰更主動到「一樓一」搵鳯姐洗毛巾。他接受《香港01》訪問,說:「我哋主要喺洗毛巾,但當時冇生意,我同拍檔講,咁最大市場係性工作者啦,我就隻身去砵蘭街嗰啲地方,一上去我話我嚟sell洗毛巾,啲鳳姐就話:『叫X冇任歡迎,如果sell嘢就唔該哂!』可能做慣二打六,我哋都俾導演X慣啦,人哋都好禮貌,所以呢間唔得,我咪去第二間囉,我同佢哋講我哋平啲,而且有質素,有競爭先有進步嘛,結果最後有3間幫診我哋,初時請唔到司機,我要洗埋仲要攞埋上去,其實都係搵食啫,演員只係我其中一個身份,我都要維生㗎。」

方紹聰因為經常當綜藝節目的獎品先生,最後得幕後給機會在《Sunday扮嘢王》扮郭富城,當晚張振朗扮張智霖。

爆騷路人甲 多謝編導畀機會

未做洗衣鋪前,方紹聰在無綫多年來都係當閒角,劇集做路人甲,綜藝節目當獎品先生,他說:「我做路人甲做到爆騷,做到每年差唔多100個騷,幾乎每套劇嘅路人都係我,獎品先生都做咗好多年,好多人唔願做,但我冇所謂,今次《心》劇有個多戲嘅角色,都係因為呢集嘅導演Calvin Leung,佢做助導嗰陣成日搵我做路人,跟住佢升咗就畀呢個機會我,我好感激佢,另外做獎品先生,亦因為做得多,結果班幕後畀咗個機會我喺《Sunday扮嘢王》扮郭富城。」

 

方紹聰未入行前在海洋公園哈老喂扮鬼,他的洗衣店開業兩年,初時搵生恴、洗毛巾、送貨全部自己一腳踢。

演路人甲行簷篷 安全冇人理

29歲的方紹聰,大部份人叫他奶仔,他說:「細嗰好肥,俾人叫肥奶,到大個出嚟做嘢,冇理由叫肥奶㗎,所以就改咗英文名Milkson,但電視台班阿姐又唔係好識讀,所以叫我奶仔。」因為身型而改名,亦因為肥仔嘜身型而入行,他說:「我報名讀入訓練班,我原本搭緊車去海洋公園返工哈老喂扮鬼,TVB突然打嚟叫我面試,我原本諗住唔去,因為我唔返工冇咗800蚊,但當時TVB嗰條友話『𠵱家成千人排隊,你今日唔嚟就冇咗個機會。』我諗下又覺得好似講得啱,我最後搭埋的士,成本好貴。原本只需要講你叫咩名,面試編號就走得,但我唔甘心就咁就算,於是我喺珍姐同樂小姐面前話自己其實識跳舞,我仲即刻跳咗兩嘢俾佢睇。到第二次面試,我再跳多次,其實我讀IVE嗰陣已經學跳舞,所以我想俾佢哋知道。」結果方紹聰在2009年成為24期藝訓班,過關斬將先入到行,但在無綫捱又怎會舒服,除了收入,被冷待亦是常事,他說:「記得有次拍《耀舞長安》,我哋幾個訓練班,要喺古裝街的簷篷行,其實都好高㗎,撻落嚟都會死,當時梁烈唯都有份,我記得拍佢嗰陣,有武師攞住張榻榻米傍住佢,但到我哋幾個訓練班上去,啲人走哂,好多人去食煙,好似冇人care我哋會唔會受傷咁….……」

《老表,你好hea》劇中有隊《半紅不黑》方紹聰是成員之一,當時蔣志光更帶埋他們去登台。

因為「鍾意」 再辛苦都捱落去

方紹聰有自知之明,他知道這條路難行,但仍堅持因為這是他最喜歡的工作,他說:「為錢人哋唔會喺TVB,如果為錢我亂做其他工都會多過喇,我揀藝員呢份工,因為我最鍾意,同埋以我自己能力嚟計,我係做得最好,我可以做貨車佬,我亦會做得好,但我冇鍾意感覺,亦因為我鍾意,就算40幾度著住古裝,我都可以响太陽谷(古裝拍攝熱點)做路人甲而唔覺得辛苦。因為我做完係開心嘅,只係呢個原因令我繼續做落去。」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。