【心理追兇】底薪9千幾照畀家用 李君妍:只諗賺錢唔做藝員啦!

撰文:
最後更新日期:

李君妍17歲入無綫訓練班,捱了8年,在《心理追兇》飾演老San。

除了《心理追兇》外,之前的《鐵馬戰車》《警犬巴打》李君妍都是飾演女警。(網上截圖)

看《心理追兇Mind Hunter》見到馬國明終於有個正經角色,敖嘉年捱到40歲終於做第二男主角,捱足多年做到成績,觀眾都替他們高興。主角要捱、要等,其實配角更加要,好似劇中經常跟住Win sir(敖嘉年飾)查案的女警李君妍,劇中戲份不多,每次都是交待一下案中死者身份,和主角有一兩句對白,觀眾未必有留意,但李君妍捱了8年,由過鏡路人、妓女A、食客等閒角角色…..到《心理追兇》先有這個比較多戲份的角色,一步步捱上去,她接受《香港01》訪問時說:「我係24期藝訓班,09年我17歲讀完中五就考,我仲要媽咪陪我簽合約㖭,呃住老豆簽約,佢發現咗之後問我做咩入去做茄哩啡。」父親無心快語,李君妍是不開心的,但幸得媽媽支持,先令她開始捱落去。

2011年李君妍參加無綫《功夫新星》,但其實她不太懂功夫。(網上圖片)

每月得6千幾蚊駛

無綫藝員人工有幾多?眾所週知,李君妍冇後台、冇家底,入去預了捱騾仔,她亦試過要搵兼職幫補,她說:「上年我去咗朋友間賣健身奶粉嘅鋪頭幫手,每日大約有3百幾蚊左右囉,𠵱家我藝員嗰份助底有9千幾蚊,我又冇咩負擔,(駛唔駛俾家用?)畀三千蚊囉,所以唯有希望爆騷先得,或者出面有啲活動賺多少少,如果只諗賺錢我唔做藝員啦,返是但一份工都可以,我唔想咁呆板呀,一定要返朝九晚五,做藝員自在啲,接觸唔多嘅嘢,而且我好知足,食飯平平哋,食飽就得。同做演員好有滿足感,每次做完我都好想有人睇到,好想得到觀眾嘅認同。」如果公司未有工作安排,李君妍亦會盡量找演出機會,2013年幫開片拍了《Come one James》點擊超過40萬。

《心理追兇》劇中敖嘉年每次出動都有李君妍,這個連戲角色原來是敖嘉年引薦給監製。(網上圖片)

除了認同,李君妍當藝員更克服了她的學前恐懼症,她說:「由細到大我去到陌生環境都會好驚,我第一份工係做侍應,我好緊張,試過做做下嘢,見到媽咪啲朋友行過,我驚到喊咗出嚟,我做咗一日就冇做,由小學升中學都係,頭幾日返學會驚到流眼淚,但做演員就冇,由面試到正式入行,我都唔知點解冇再緊張到。」或者連身體都告訴她,這才是妳應做的事,亦令李君妍明知在無綫條路難行依然肯捱落去。

敖嘉年推薦入劇

但肯捱不代表路易行,李君妍今年25歲、捱8年先有配角演,但同劇的蔡思貝26歲已是6套劇第一女主角,李君妍:「大家差唔多年紀,真係會羡慕佢哋咁快有機會,但每個人條路都唔同,可能我條路要慢慢嚟呢,我希望自己嘅戲份,可以一步步加上去,其實而家已經好過之前好多喇,今次《心理追兇》有呢個角色,係因為敖嘉年介紹,因為之前跟佢同楊盼盼拍過套大陸嘅電視電影,佢覺得一team人應該有唔同角色,所以佢向監製介紹我,所以我好多謝佢。」後生女慢慢嚟啦,總有機會的。

+9
+8
+7


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。