【心理追兇】韋家雄苦戀王君馨做兵仔 現實離過婚:係一個失敗者

撰文:
最後更新日期:

無綫劇《心理追兇Mind Hunter》中,王君馨飾演反社會人格障礙患者,會利用身邊人為她做事,而劇中她的兵仔,正是資深演員韋家雄,外人看來他被人利用,苦不堪言,但在兵仔的世界,只要女神開心,他們甚麼也願意做,甚至不惜殺人,為愛人受牢獄之災,就算終身監禁也樂在其中,如此犧牲只為女神一句「喜歡你」!而這種自虐式的單戀,韋家雄演來入木三分,最後他更在獄中自殺,令不少觀眾看到眼濕濕,大讚他好戲!

韋家雄在《心理追兇Mind Hunter》中,飾演王君馨的兵仔。(網上截圖)

王君馨在劇中一句「我好鍾意你」,便將韋家雄送入死地!(網上截圖)

韋家雄在1995年加入無綫,最為人熟悉的角色,是《真情》中的大力,而早前熱播的《親親我好媽》以及戲分甚重的《心理追兇Mind Hunter》,他也是飾演兵仔角色,為女神可以赴湯蹈火,萬死不辭,演技備受讚賞,感情相當投入,名副其實是「御用兵仔」。由於太過入戲,令網民憶起他在2010年,曾被指是同劇拍檔葉翠翠的兵仔,企圖越級挑戰追求女神!

獲得女神的愛,在心滿意足下自殺,是幸還是不幸?(網上截圖)

韋家雄接受《香港01》訪問,他卻說出了另一個版本,「我唔會去介意啲人點寫,因為呢啲係做出嚟嘅新聞,唔係事實,真相係嗰時拍緊套劇《4 in Love》,我好投入咁去做啫,唔係雜誌寫嗰樣嘢嚟!(跟葉翠翠還有否聯絡?)冇啦!其實拍戲嘅時候都唔係成日聯絡,嗰時對手戲多,咁我會教佢點樣去做,始終佢當時比較新,我都係盡返演員本分,希望條線做得好睇啲。」

韋家雄被指於2010年追求《4 in Love》同劇拍檔葉翠翠,而他矢口否認,只說是教對方演戲。(東星圖片)

+3
+3
+3

聽到網民讚他好戲,韋家雄先說多謝大家支持,但他卻否認將兵仔心情代入劇內,「拍嗰時係投入角色裡面,呢個人物其實幾慘㗎!佢自己活喺自己嘅感情世界。當然唔可能係親身經歷啦!又殺人又坐監咁,佢一直活喺自己世界,但要同鍾意嘅人分開。」翻查資料,韋家雄跟前妻育有一子,現時已經20多歲,而他正式公開的戀情,是跟無綫藝人陳嘉嘉拍拖3年,可惜也是分手收場,最傷人的還是前度女友在跟他分手半年後,去年初跟日籍男友結婚,難免有種「愛人結婚了,新郎不是我」的挫敗感。

韋家雄嘆了一口氣,徐徐道:「我喺感情生活上,都算係一個失敗者。(為何會如此說呢?)唔知呀!可能係命運上嘅安排,每段感情都唔長久。(現在的感情狀況?)宜家冇拍拖呀!單身囉!全程投入工作。(會否再去經營另一段戀情?)隨緣啦!有又唔抗拒嘅,但我唔會再刻意去搵囉!」

韋家雄憑《梟雄》一劇,曾贏得2015年台慶頒獎禮「最佳男配角」獎。(資料圖片)

在感情上,韋家雄聽天由命,靜待緣分降臨,但說到他的本業─演員,卻有種難言的自信,重提他在2015年贏得台慶頒獎禮「最佳男配角」,他說:「獎項只係公司對演員嘅肯定,但演員最重要是做戲給觀眾睇,好似《心理追兇》嘅角色,觀眾覺得好,我已經好開心。老實講TVB人工係唔高嘅,夠糊口囉!我反而享受創造角色,同埋演出嘅時間,做完之後,我又再去應付另一個角色。」專注於事業的男人自然有他的魅力,希望韋家雄感情有着落,早日找到他的真命天女。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。