【全職沒女．劇透】張兆輝陳松伶最終結局　又係大台式皆大歡喜？

咁聽日就大結局㗎啦喎！到底男女主角，張兆輝同陳松伶最後有冇一齊？就劇透一下畀大家知啦。兩人去到最後都似乎各有路向，張兆輝就不再留戀香港，索性辭去仲夏夜酒店總經理一職，安心將香港業務交給兒子張振朗打理，然後孤身走我路，打算飛長途機打理南美洲業務；而陳松伶同樣想遠走高飛，有房務不做，特意去學調酒。正當大家都打算「你有你生活，我有我忙碌」之際，劇情就充滿懸念，點解？巧合地，陳松伶在機場見到前度男友，還拖著新女朋友。前度眼見陳松伶孤家寡人，於是口痕痕上前講難聽說話，串對方到而家仲係單身冇人要，真係好cheap。與此同時，張兆輝就好似有心靈感應般，不停地打嗝，原來他感應到陳松伶近在咫尺，仲被前度當眾奚落！張兆輝當然要來一個英雄救美，即刻衝上前，一手攬住陳松伶，做住「PTBF」先，然後頭也不回地離開。

結局情節就講住呢度先，大家都會疑惑張兆輝與陳松伶一直以來都醞釀愛意，感情若即若離似的，而兩人手挽手離開後，會否順理成章變做真﹒情侶？抑或是走咗就算？就充滿想像空間，加上網民要求加開續集，會否當作一個伏線，為續集鋪路？據消息指，結局將會反傳統，大家想咁？但其實唔會咁......唔，真係意味深長。

除此之外，網民不止關心張兆輝與陳松伶去向，而且還想知道兩條感情線：張振朗與陳瀅、謝東閔與王卓淇佢地又會點？喺呢度再細細聲爆畀大家知，後者嗰Pair係唔會一齊㗎！其他就.....都係唔講太多，睇電視啦！