【全職沒女】陳瀅戀愛重溝通 對愛情沒信心:冇諗過投靠男人

撰文:
最後更新日期:

睇過《全職沒女》,都知陳瀅如何色透張振朗。加上陳瀅外表如此甜美,笑起上來甜絲絲,想必她會是個小鳥依人,非常girlfriendable。可是陳瀅就話自己比較獨立,不過並非在戀愛方面,而是由加拿大回流返港發展,需要重新適應生活環境所形成。

陳瀅為人獨立,但外型又好甜美,幾合大多男士心水。(Facebook圖片)

「思鄉」喊住致電爸爸:我唔得啦!

「細個因為有家姐、外婆一齊住,所以有咩事都係佢幫我解決,關於錢銀上嘅嘢、我食嘅嘢、我住邊度都交晒畀佢處理,都會話:『家姐我要呢樣...』,又或者外婆煮飯畀,好多事自己唔洗點理。」在家千日好,有屋企人始終有照應,煩惱都少好多。直到她返到香港半工讀,現實就逼住本來生活有依靠的她學會獨立:「自己要學識揸車,學下熟悉香港啲路。」但這些技術性問題,要解決其實唔難。難就難在夜半時,關上房燈一剎隨之襲來的寂寞感及不習慣,所謂Homesick,一個人是解決不來。「當時讀緊City U(城市大學),租咗一間宿舍。因為我係外國讀書,自己住喺一間屋,空間比較大,空氣都清新啲;但返到嚟香港,真係得一個床位,對住四面牆。得返自己一個,自然就會好掛住屋企人,就即刻打電話畀爸爸:『我真係唔得啦。』,佢聽到就叫我上去廣州住下。」如是者,陳瀅當時中港來回兩小時車程,重覆又重覆,她沒有覺得麻煩,因為再獨立的人,都會需要精神支柱。其後,陳瀅在香港當模特兒,開始掌握到生活的節奏。對於獨自生活,不自覺地習慣了;同時開始有收入,會為自己安排一個舒適的環境。以致未來,陳瀅想再擁有一個更好的空間。

陳瀅真係好上鏡!(符祥定攝)

對愛情冇信心 亦不想靠男人

生活環境令陳瀅變得更獨立,除此之外,她的愛情觀也隨經歷有所轉變,首要條件就是自己讓自己更開心。「其實我同《全職沒女》所做嘅繆思有啲似,都會覺得有時唔好太倚賴男人,要靠返自己實力,為自己做返啲嘢,自己生命係要由自己去掌握,唔係要人哋畀啲咩自己去得到滿足。」加上陳瀅從小到大眼見身邊朋友、長輩的感情都是斷斷續續,未有一個很完美的伴侶可以走下去,這也是促成陳瀅隻身返港生活的原因,同時都沒有旨意去投靠任何人,尤其是男人。

「就算拍拖,我都會Keep住有自己想做嘅嘢,而唔係得閒就:『喂,餵我食嘢吖』,又或者『幫我找卡數啊!』」雖然有好多男士都想為女神這樣做,但陳瀅的中心思想,都是不要為愛情而失去自己。所以陳瀅經過過往的經驗,對擇偶方面有所調整:「之前都係基於愛,但未有足夠嘅溝通,理解唔到各自工作嘅狀況,好多時聽到做嘢嘅事,只能夠講:『加油啦,唔好唔開心啦。』又或者自己做一場戲做得唔好,好唔開心,對方聽完只係講:『明天會更好。』缺少咗內容喺入邊,點解我會唔開心?點解我會覺得自己做得差,分析唔到。」陳瀅表示最近才發現這些問題,就算往後戀愛對象未必是圈中人,都希望彼此一定要有良好的溝通,而不是講心事時輕輕帶過。

【全職沒女】女神陳瀅拍拖好慢熱 色誘張振朗:成件事錯晒

+10
+9
+8

現時單身的陳瀅,透露往後的戀情都會保持低調。另一邊廂,她坦言可以「再見亦是朋友」,目前跟有些前度仍有聯絡:「我冇嘢嘅,自己份人比較easy going,同時又好爽快。所以有時同朋友,或者之前嘅男朋友,大家好耐都冇見,但可能突然見到一樣嘢會諗起佢嘅,我唔會覺得好冇臉同顧慮,我會直接影張相,send畀對方:『hi,think of you』呢種關係唔係日日講嘢,都係以朋友關係關心一下近況。」照咁睇嚟,唔知她的前度之一何猷亨有冇份呢?



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。