神耆小子｜黃子桐首拍影帝鄭則士演花痴被嚇窒：佢氣場好勁
撰文：吳子生
出版：更新：
港姐黃子桐（Rachel）今日（2/6）現身將軍澳電視城出席無綫新劇《神耆小子》開鏡拜神儀式。Rachel透露在劇中飾演一名花痴公關經理「姚金花」，每次見到小鮮肉都會春心蕩漾：「其實我以前冇演過花痴呢啲角色，而我身邊啲同事知道之後笑我都係做番自己冇難道，雖然平時我同其他同事都好玩得埋，但其實我內裡好怕醜。（你過份熱情會否令男同事誤會？）其實都會有嘅，但我好清楚自己嘅界線，我絕對唔會同娛內人有情感上嘅接觸，係唔會發展戀情嘅。」
黃子桐在劇中飾演一名花痴公關經理。（葉志明攝）
對於能夠與影帝鄭則士（Kent哥）首次合作拍劇，Rachel大感興奮：「過往見到Kent哥，我都係透過電視見到佢，而今次合作我第一次見到佢，感覺到佢氣場好勁，諗住佢會嚴肅，點知埋身請教佢嘅時候，佢係好友善仲會笑住口反安慰我，叫我唔使咁驚張，只要做好功課記熟劇本，到時埋位嘅時候自然唔好慌。Kent哥佢好謙虛，佢仲話要同我哋嘅後生學習咁話。」
黃子桐今日出席無綫新劇《神耆小子》開境拜神儀式。（葉志明攝）