中年好聲音2｜戚黛黛衝破心理關口參選　港姐季軍曾晉級新秀決賽

無綫音樂選秀節目《中年好聲音2》今日於電視城舉行海選，吸引了一眾喜愛唱歌的中年男女去參加，2003年香港小姐季軍，現年41歲的戚黛黛也有份參選。戚黛黛曾效力無綫及亞洲，現為now寬頻電視合約藝人。其實戚黛黛一直熱愛唱歌，她在選港姐前就曾參加過1998年全球華人新秀歌唱大賽決賽。

戚黛黛在現場唱完歌後接受訪問時表示：「緊張到差啲暈，我都預期唔到點解可以緊張到咁，表現未如理想，因為把聲係好緊，緊到好似沙咗喉嚨咁，盡咗力喇。參選呢個緊張過參選港姐。(頭先畀人話你有懶音？) 咁會進步嘛，有懶音咪有懶音囉，咪改囉。(咩原因驅使你嚟參加？) 其實上年都想參加，不過中咗COVID，把聲又爛晒，覺得係天意唔想我參加。但係我有睇個比賽， 一路睇一路跟住唱，睇到身痕，到第二季就心大心細想參加。我有包袱，唔知自己輸唔輸得起，身邊朋友都叫我試咗先。今年係我參選港姐20周年，係我參加新秀25周年，我覺得要為自己做啲嘢。」她的親友都好支持她，當中包括閨密陳茵媺。她們還愈來愈似樣，不少網民都曾留言話兩人十足孖生姊妹一樣。