【不懂撒嬌的女人】最後Sad Ending？ 王浩信暖男失靈唐詩詠失蹤
《不懂撒嬌的女人》算是TVB近期的出色之作，其中一個「突破性」的改變，就是好似美劇般以Season劃分，播完Season One，隔23小時再有第二季。係就係快咗啲，但至少見到片頭Mall姐由一個Dry爆中女，其後搖身一變成充滿愛情滋潤的小鳥依人。對比過往流水作業式的Opening，《不懂撒嬌的女人》真係有誠意得多，算是能夠挽留觀眾的心。至於《不》今個星期來到最後直路，5月28日便大結局，很多人都比較關心結局如何？據知結局不會是Happy Ending，但Sad還Sad，有指TVB眼見觀眾反應不錯，將會有特別安排，跟完美劇似乎再仿傚日劇，加推特別篇？唔知觀眾受唔受呢？
睇到TVB的預告，三條感情線：Gordon與Mall姐、Cherry與Saving哥，以及Annie與Oscar，他們各有發展。其中發現Mall姐與Gordon之間並不是很順利，因為還有高海寧飾演的田蜜，公開地向Mall姐下戰書，要一齊享用Gordon。與此同時，意外發現Mall姐與田蜜都有著婚紗的場面，令人聯想Gordon最後會陷入二揀一的局面（不要FF有一夫兩妻，觀眾見到都會噓！）。
至於Cherry與Saving呢？自從Saving發動暖男攻勢之後，問題就來了。兩人發現相處方面有很多磨擦，除了工作之外，同時對婚姻都有所疑慮，就算最終都可以一齊影婚紗相，眼見兩人攬埋一齊都喊晒咁口！之後Saving穿針引線讓Cherry來到台南，再次彈《陪著你走》，係就係好感動，但Cherry最後都失蹤，Saving陷入放棄的邊緣，此際才再遇上對方，可惜結局已不如當初。
早前王浩信與唐詩詠出席宣傳活動透露有可能會有第二個結局，至於到時播那一個結局，則要視乎觀眾反應，莫非係真？據消息指，這個說法並非100％準確，因為《不懂撒嬌的女人》的結局有別於過往的愛情劇，最後是Sad Ending，但深怕觀眾睇完結局會覺得充滿遺憾，因此將會有特別安排。而早前唐詩詠未正式宣布與洪永城分手時，與王浩信在中環拍攝時被追訪。雖然焦點在唐詩詠的戀情上，但當其時她疑似正拍攝與王浩信再相遇的場面，相信就是《不懂撒嬌的女人》的特別篇。