鄭少秋大女鄭安儀自殺身亡 汪明荃：佢識得處理，加上佢係大俠嚟

汪明荃昨日（3日）現身葵涌為海馬牌拍攝廣告。提到鄭少秋（秋官）在未婚前與圈外女友盧慧茹拍拖3年，二人於1968年誕下女兒鄭安儀，日前鄭安儀在美國自殺身亡，終年55歲。阿姐受訪時表示：「其實我唔識佢，但我係知佢有一個大女。（有冇打電話慰問秋官？）我諗我哋畀啲時間佢，（識唔識盧慧菇？）我唔識佢，亦冇見過面。（知唔知秋官有過呢段情？）我唔知呀，我又唔識又點知啫。（唔識都可以知！）淨係知道佢有個女咁囉。（最近同秋官有冇聯絡？）同佢不嬲都冇聯絡。（同欣宜有冇聯絡？）其實同佢都少聯絡。（之前傳佢有病？）我見佢係瘦咗好多，仲以為佢減肥。不過我有啲朋友都同佢熟，知佢冇乜嘢。（兩個女先後出事，擔唔擔心秋官頂唔得住？）我諗佢唔會，佢咁大個人，佢識得處理，加上佢係大俠嚟。」