陳卓賢馬場唱歌　房屋署署長羅淑佩台下如痴如醉 Ian：畀啲空間佢

陳卓賢（Ian）今日（15日）現身沙田馬場，以一身靚仔煲呔造型亮相，Ian率先在開幕環節登場唱出《正式開始》、《抱抱無尾熊》及《留一天與你喘息》，觀眾席幾乎全被Hellosss（Ian粉絲）佔據，就連首席Hellosss——月前升職的房屋署署長羅淑佩都有到場，她更全程跟住Ian唱歌，非常投入！

活動結束後，Ian在訪問中答謝署長，他說：「好多謝署長，好開心再次見到佢，有一次佢做訪問有講我個名話好欣賞我，我媽咪都好proud咁話聽電台聽到署長讚我叻仔，佢都有讚我叻仔，我阿媽好少讚我！」

被問到有否與署長打招呼，Ian表示：「頭先同佢問見到面，打咗個招呼，感謝佢支持，但係希望大家俾啲空間佢，因為佢喺工餘時間做一啲令自己放鬆同享受嘅事，我覺得係好尊重，亦都好多謝佢！」當記者提到局長全程跟住唱，Ian受寵若驚說：「我好開心！好鍾意同大家大合唱，又可以突擊測驗考下大家係咪真係有留心聽。」

Ian又透露今次是第二次入馬場，之前曾來過拍宣傳片，但賽馬日入馬場是第一次，很期待觀賽，而且學騎馬一直是他其中一個必做清單，希望有機會和拍攝與騎馬有關的劇集或電影。Ian一向是MIRROR中的運動健將，中學已是排球隊、田徑隊，又識打籃球，早前又踢波、學溜冰和冰球等，就連MIRROR五周年宣傳照都跳高跨欄，他笑說是被攝影師出賣：「平時影相，攝影師嘅要求我都盡力配合，點知就輸經驗，我哋逐個逐個出去影，我話跳起咁動感，佢話個個都係咁，咁我咪跳囉，點知睇返啲相得我一個係咁，可能大家對跳起嘅定義唔同。」不過可以的話，Ian希望MIRROR可以搞運動會，更表示：「「我可以玩十項全能賽，佢哋可能嫌攰就唔玩，我就唯一一個攞晒金牌！」

早前經理人花姐在社交平台放負，Ian透露近來冇同對方見面，但他認為每個人都有自己日常煩惱要面對，相信大家懂得自己調適，希望花姐早日解決，而他就不會刻意問候，並謂：「有時我自己有嘢煩緊，都唔知人哋問唔問候你好，可能會加重咗你擔子，可能唔想人擔心，大家會搵到自己個方法搵到出口，俾啲空間佢！ 」

談到隊友Lokman（楊樂文）、Alton（王智德）退出與Tiger（邱傲然）合作的服裝品牌，Ian覺得不會影響到兄弟間的感情，他說：「大家感情根基好深厚，我相信大家可能有唔同發展或者想法，畢竟當初大家有一啲大概相同嘅想法，就一齊合作睇吓有咩搞作，但係如果覺得想要多啲自己私人空間、個人發揮，亦都係好嘅決定，最緊要佢哋自己OK，但佢哋感情好好係無可否認。」