【詭探】邵仲衡爆高潮劇情 高官女中環摑阿媽:佢入咗邪教!

撰文:何志衡
出版:更新:
邵仲衡為演好角色,跟師傅學茅山手印及法術。(網上圖片)

熱播中的ViuTV新劇《詭探》以香港4大都市傳聞作賣點,但在劇中飾演茅山顧問的大佬孝邵仲衡就向《香港01》透露唔只咁簡單,大爆會玩埋某高官個女入邪教,邵仲衡話:「嚟緊會講有個高官個女喺中環夜店發癲呀,打阿媽呀,你知我講邊個啦!咁我哋去查咩事,原來佢信咗邪教,準備發動恐襲添!」嘩好敏感喎!當然只係戲劇效果同實情無關啦!

大佬孝在戲中要施展各種茅山手印和法術都似模似樣,他稱是真有向師傅學習的,他說:「簡信回師傅係套劇嘅顧問,開拍前有上佢道堂偈下了解下,但記唔到咁多就影低呀,劇本都有寫係用文言文,成日諗急急如律令嗰啲;師傅或者佢啲徒弟拍嗰陣每場戲會喺現場教嘅。」不過邵仲衡話自己唔係太信呢科:「我當睇衞斯理咋!我小學同中學都係天主斆學校,成日要諗經㗎!我冇宗教信仰但係屋企會供奉觀音,我仲識打個觀音結(手勢)。」不過佢強調自己唔係迷信:「我只係覺得對觀音有種感覺,係一種緣份。」所以《詭探》入面幾可亂真的茅山法術,其實只係大佬孝演技好啫!

+5