女友跟兩男去旅行實出事？　網紅譚杏藍：講信任啫，我男友好大方

打工仔除了望出糧，最期待的日子，莫過於去旅行叉叉電，情侶檔又好，一家人又好，甚至一大班朋友柴娃娃出發，什麼工作學業感情煩惱都可以拋諸腦後。不過講到旅行亦往往隱藏情侶分手危機，近日有網民開post，就話因為去旅行搞到同女友分手，吓，去旅行都要分手？皆因男主角冇份去，只是女友跟兩位男性朋友出發，沒有即場發生血案已經要還神。

該名網民表示女友原先跟他說有兩男一女的友人，一行4人出發，但樓主送女友去到機場，才發現只有兩名男士同行，女友解釋因為其中一個女性朋友甩底，所以變成三人行，而且之前book了一間有兩張床的大房，現在變成兩男一女共處一室，個女仔有冇損失就未知，但樓主就非常震怒，仲話要同女友分手，但其後他又開post問人意見，而其他網民就一面倒留言「個女仔早有預謀」、「早分早著」、「返到嚟仲有剩嘅？」，似乎對樓主遭遇深表同情。

網民開Post稱女友跟兩男去旅行：

網絡紅人譚杏藍知悉該名網民情況後，則表示她也遇過類似情況，但當然不會鬧分手啦，她接受《香港01》訪問，「之前都有同另外兩個男仔去旅行，去韓國嗰啲呢，我覺得最緊要係老實，去之前我有問咗我男朋友，佢話可以先至叫佢哋買機票酒店，好彩我男朋友又好大方嘅，最緊要係信任嘅啫。(如果男友跟其他女仔去旅行呢？)信得過嘅話，男朋友同幾個女仔去旅行，我都無乜所謂。」

譚杏藍還半開玩笑說若然男友有能力約到幾個女仔一起去旅行，更加要大讚他有本事（估計她男友恆仔有本事也沒有如此膽量），而她亦教網民如果不幸遇上樓主的情況，千萬不要意氣用事，「買晒機票、酒店唔去確係好可惜，但最緊要尊重另一半。最好嘅處理方法，咪買多張機票一齊去囉，唔使去到分手，旅行最緊要開心，去完旅行分手收場，咪得不償失。」要有一個開心假期，還是跟男／女朋友去旅行最穩陣，總好過互相心掛掛，鬧出個大頭佛。