冰上火花｜Ian吊兒朗當　柯煒林咀完林愷鈴即傷及舊患離場

由陳卓賢（Ian）、江𤒹生（AK）和楊樂文（Lokman）主演嘅《冰上火花》今晚終於播出，首集大部分焦點都落喺火花隊靈魂人物柯煒林身上。 為氹女友林愷鈴一笑，拖實對方上冰場浪漫一番，之後再喺群眾起哄下咀咀。不過甜蜜完之後，柯煒林嘅火花隊對戰Lokman、AK嘅暴風隊，身為靈魂人物嘅佢被狂瘋圍攻，上半場未完已經受傷收場。而飾演柯煒林弟弟嘅Ian ，任職冰場職員仔吊兒朗當，開工懶惰、恰細佬樣樣齊，兄弟間成就如天壤。