姜濤望與女網民互相了解　無論點都想同佢講聲對唔住

姜濤早前在公開活動時被質疑「咪嘴」，其後引發出連串風波，雖然姜濤事後道歉，女網民亦改網名，但女網民表示仍然受到騷擾，希望大家停止欺凌。姜濤今日（18日）與MIRROR成員出席《12怪盜》互動體驗場時，首次為事件開腔回應。

他表示有透露公司希望與女網民聯絡，並互相了解更多。「但暫時未有聯絡，亦都希望可以了解佢多啲。（親自去了解定DM?）無所謂，等公司安排。無論點都想同佢講聲對唔住，作為藝人有咩情緒都唔應該有負面能量畀大家，我覺得呢個係我哋嘅職責，亦希望呼籲所有人好似我哋咁散播正能量，唔好再有負面嘢畀人。（呢一課係咪上得好大？）今年都上咗好多堂，所以好多謝上天俾機會我去經歷呢啲嘢，希望自己喺呢件事後成長多啲。」

姜濤表示難用三言兩語解釋成長了甚麼，最實際係用表演去告訴大家。他又表示之前一直無決心戒玩社交媒體，但經過今次事件，令他更有決心專注在事業上。