今日睇真啲｜袁潔儀任主持追訪天后累亞視遭封殺：人哋係大明星

袁潔儀今日（24/1）現身觀塘出席無綫新劇《狀王之王》宣傳活動。提到早前接受港台節目大爆任亞視皇牌節目《今日睇真啲》外景主持時，因追訪天后王菲導致亞視遭封殺。袁潔儀接受《香港01》重提舊時都得啖笑：「你哋都知，人哋係大明星，大歌手，點會冇記者追埋身。當時現場係有好多傳媒喺度，而佢又一路行，變咗我哋嘅職責就係一路追，就一路問，就算佢唔答我都一樣要照問。」

袁潔儀續說：「當時人多比較亂，唔知係咪我比較高啲，加上人多擠擁嘅情況之下，唔知係咪人撞到我，然後我個咪撞到佢，但我想講，連我自己都唔知有冇撞過佢。（事後收到對方來電投訴？）係啲同事話返畀我知，話佢以後都唔做亞視訪問。嗰陣時冇咁方便，如果嗰陣時有網絡，我諗佢已經即刻喺網上面爆晒出嚟。（嗰次之後，出去採訪有冇陰影？）係會驚咗，變咗見到人多嘅時候，就要扎住個馬，避免被人撞到我，我又撞到訪問緊嘅人，累我又孭鑊。（事後有冇想同對方道歉及解釋？）其實之後撞唔返，都有諗住透過佢助手及佢公司同事同佢講聲，但就無緣份，到而家都未見過。」