【賭城群英會】點解個個都要戴假髮? 吳家樂:晶哥想要另類啲

撰文:
最後更新日期:

無綫熱播中的《賭城群英會》,至今為止口碑尚算不俗,尤其馬國明等人整蠱吳家樂,讓人笑到現腹肌,當笑片睇一流。但看了幾集,不難發現劇中起碼5個角色是戴假髮,包括劉兆銘、郭峰、黎彼德、余子明、吳家樂,莫非因為有不少年紀大的老戲骨,咪住,吳家樂好後生喎,全程戴假髮究竟是什麼玩法?

吳家樂戴上假髮飾演屠大寶,他表示最緊要觀眾留意到他們在造型上花的心思。(網上截圖)

Ming sir當年在《千王群英會》飾演一頭白髮的仇大千,現在再以滿頭白髮示人,向當年角色致敬。(網上截圖)

劉兆銘Ming sir飾演的賭魔屠城,其實是向30年前的《千王群英會》致敬,Ming sir滿頭白髮的造型,基本上就是當年的仇大千一角,所以他戴假髮不難理解,不過現時差不多一人一假髮,就令成齣劇變到怪怪地,近日更被網民議論紛紛。其中吳家樂就被網民笑戴了假髮後,比起劇中的父親李國麟還要老,吳家樂接受《香港01》訪問,他表示樂於接受網民的批評,「有人講最緊要,即係有人留意到我哋嘅造型服飾方面花咗啲心思。老實講外型年齡嘅嘢好主觀嘅,有啲人覺得我屠大寶個角色後生咗添,各人有各人意見,等於初初《城寨》馮春美,行出嚟啲人都話你咁抽離嘅,無端端城寨點會有人白袍白面咁,之後咪一樣睇得投入。」

郭峰在劇中的假髮仿如頭飾,更會更換不同顏色假髮用來襯衫。(網上截圖)

當問到他為何會有這些戴假髮的角色,家樂表示:「其實係晶哥(王晶) 佢自己設定,想擺一啲另類啲嘅角色落嚟,好似我依家每一寸髮絲都係要勾起,唔止頭髮,連衣著都係好誇。(會否介意造型太誇張?) 傾劇本嘅時候,都唔知其他人嘅造型係點,我都冇話特別去問點解,如果佢哋覺得試完出嚟OK喎,就咁去啦。我又唔會覺得有問題,反而覺得幾好添呀,起碼俾人睇到唔係平時做主持嘅吳家樂。」

黎彼德扮演神算子,當假髮純粹搞笑。(網上截圖)

雖然幾個角色也戴上假髮,但原來劇中吳家樂等人全是當作真頭髮去拍攝,只得郭峰是會講明戴假髮,「睇落去就知,郭峰哥個假髮係用嚟襯衫嘅,所以前面個一少撮係會成日唔同顏色,好似頭飾咁,而我同Peter哥(黎彼德)都係當真頭髮,依家出嚟效果幾得意。」不過家樂強調現時的故事開始只是輕鬆一點,跟着到了中段叻哥死,成齣劇的氣氛會有一個好大的轉捩點,兩家爆發衝突之外,還會有不少人犧牲添。

劇中余子明回憶當年的世紀賭局,當然要戴上假髮扮後生啦。(網上截圖)

吳家樂造型其實相當搞笑,但他強調暫時自己只是二世祖,之後更會愈來愈奸。(網上截圖)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。