【果欄中的江湖大嫂】黃浩然15吋麒麟臂勁搶：食好多高蛋白質食物
撰文：陳栢宇
出版：更新：
黃浩然竟然話自己唔大隻，咁呢個世界應該一個爆肌猛男都冇。
相信每一個港女都鍾意睇靚仔，如果再加埋「大隻」呢個屬性，應該沒有邊幾個會頂得住唔出心心眼。爆肌靚佬黃浩然雖然在之前播完的無綫劇《平安谷之詭谷傳說》中着得密密實實甚少騷Quali，但他在日前首播的新劇《果欄中的江湖大嫂》中便本利歸還，以雞翼袖騷出麒麟臂明益一班女街坊，連仔都忍唔住望幾眼，想知點樣先操得一身好Body。
你哋睇睇條青筋！
謙稱自己不算大隻的浩然向《香港01》公開打造其至尊級麒麟臂的秘密：「其實一直都有玩開健身，所以都有個底喺度，咁啱拍《果欄》前都喺大陸拍劇，就帶哂啲啞鈴上去操，如果冇時間都會每日做夠二三百下掌上壓，亦都有啲係做三頭肌嘅手臂運動。」
真係舉下鐵、做下掌上壓同埋食多啲蛋白質就操到咁？
問浩然的巨臂在拍攝《果欄》時的有否15吋？他沒有透露，僅指當時每逢空閒時間都會用健身橡筋等谷大個強勁臂彎：「其實我都要食補充劑，因為我啲肌肉好易縮，要靠呢啲蛋白質等自己唔夠瞓都唔會縮得太犀利，當然平時都要食好多高蛋白質嘅嘢，好似雞胸同蛋白咁。」
提到他劇中搬貨時谷出鋼筋咁粗的青筋，他即笑謂：「其實嗰啲係吉箱嚟，為咗似返啲用勞力搵食嘅人嘅質感，大部分演員一有時間都係咁做掌上壓泵脹對手臂。」一班大隻佬喺街邊勁做Push-up？淨係想像一下都諗到個情景有幾蔚為奇觀。