王祖藍惡搞謝霆鋒變《13道瘋味》 玩食字搞gag自己笑
撰文：郭敏玲
出版：更新：
玉不琢不成器，刀不磨就冇鋒味。（影片截圖）
要惡搞，就要有個外形，紮一紮辮仔先。（影片截圖）
近年轉戰飲食界的謝霆鋒，早前在他的節目《鋒味廚房》，憑著一道西餐「威靈頓牛肉」而打響名堂。他的磨刀技巧最為出名，似是向神枱級廚神Gordon Ramsay致敬。其後網民看得意猶未盡，紛紛回顧霆鋒過往在節目展示過的「獨有廚食技能」：包括揈蕉、拍匙點綴食物法等，讓人嘆為觀止。
自從霆鋒使出獨有磨刀秘技之後，相信不少網民會引頸以待，期待霆鋒緊接下來還有什麼獨門的煮食秘技。不過，觀眾又不用太心急，正版霆鋒未獻新猷，都可以睇下山寨版。說的就是同樣在大陸撈得唔錯、惡搞搞到出晒名的王祖藍，眼見霆鋒chok住煮餸，不禁食指大動，惡搞多套《十三道瘋味》。
羊腩同花心蘿蔔一齊煮會變「渣腩」......講完自己笑咗先。（影片截圖）
祖藍早在一年前，已經惡搞過霆鋒幾次。近日霆鋒成為熱話，吸引不少網民翻睇相關片段。祖藍在造型上跟到足，頭夾住蝴蝶結髮夾，扮晒Kawaii。雖然他唔多識煮餸，但惡搞都會同「食」有關，就同大家玩「食字」！所謂橋唔怕舊，有內地網民都幾受，就好似其中一集，王祖藍示範煮羊腩，講到羊腩可以暖心胃，簡稱「暖腩」（暖男）。唔知大家覺得好唔好笑？之後祖藍再講多句：「如果羊腩跟花心大蘿蔔一起煮，就會變『渣腩』（渣男）。」空氣好似靜止了，所以王祖藍幾大都自己笑咗先。其後王祖藍自抽一下，將個梨放在羊腩上面，叫做「梨壓腩」，食老婆李亞男字，放閃放到出晒面，最後用大火煮羊腩，呢招叫「旺煮腩」（王祖藍）。唔知大家睇完受唔受落，由李亞男變成王祖藍，呢種曲線放閃方法，真係第一次見。其後有網民睇完就留言表示：「王祖藍做到霆鋒煮嘢食都要chok嘅feel做到出嚟。」都算係咁啦，唔講咁多，即刻去片。
梨放在腩上面，係梨壓腩（李亞男）。嘩，曲到直一直。（影片截圖）
最後都抽一抽自己。（影片截圖）
霆鋒表示：！？（影片截圖）