阿仙奴痛失前四 忠粉袁文傑：想佢哋可以打返好個勢
撰文：郭敏玲
出版：更新：
《不懂撒嬌的女人》今天舉行慶功宴，看見游生袁文傑，自然就會想起他的愛隊阿仙奴，之但係阿仙奴今季英超痛失前四。作為一個球迷兼業餘講波佬，當然要找袁文傑發表一下感受啦！
阿仙奴痛失英超聯前四，袁文傑卻對愛隊堅定不移。（郭敏玲攝）
點知袁文傑第一句就話：「我又唔傷心喎！如果畀佢哋搏到，其他球迷會仲傷心喎！」咁睇得開？袁文傑續道：「因為有球迷計過機率，開場前得13%，老實講，咁嘅話又點會有奢望呀！佢之前一路打落嚟，其實都只係輸過畀熱刺，但都只係想佢哋可以打返好個勢，攞返個信心，已經好好㗎啦！」
問到支唔支持阿仙奴教練雲加繼續留下，袁文傑說：「如果約滿嘅話咁咪走，佢唔會畀人炒，亦冇人炒得到佢，只係願唔願意留低㗎啫！不過後來佢喺擺陣方面，畀人睇到佢仲未技窮，只係呢件事就發生得比較遲，但如果佢係續約嘅話，我都係會支持嘅！」不過袁文傑就話雲加去向未明，分分鐘有陰謀論，而就關於阿仙奴高層之間的紛爭，雲加最終被逼走都未定，始終陰謀論要信吓！
袁文傑講波時，好charm。（郭敏玲攝）
至於組軍方面，袁文傑表示就算沒有超級球星亦無傷大雅，「利物浦、熱刺佢哋都冇美斯、C朗級數的球員啦！睇配搭嘅啫，所以都唔大問題。」袁文傑仲對阿仙奴充滿信心，而對於阿仙奴的冠軍之路尚很遙遠，他則說：「慢慢嚟啦！輪流嚟啦！車路士未攞第一個英超，都有50年冇攞過冠軍，我都唔會攞呢樣嘢嚟笑，慢慢啦，冇得急。」