【關你家事】市民家事擺上檯遭投票公審 睇住阿爸爆喊係咩玩法?

撰文:郭敏玲
出版:更新:
麥包講講下講埋自己家事,講到眼濕濕。(影片截圖)

麥包與江美儀主持的節目《關你家事》未出街已經先聲奪人,爆出黃宇詩搭上有婦之夫,以及肥媽遭受前夫家暴,望見trailer,都見到肥媽聲淚俱下,真係陰公豬,引起不少網民的關注。節目昨晚正式出街,可是網民睇完發覺並不是想像一回事,甚至有反感的感覺,究竟發生咩事?

事主Annie講到喊,被網民話睇到好沉重。(影片截圖)
兒子承鋒就被人公審,感覺幾無辜。(影片截圖)

第一集主題講單親家庭,TVB就請來素人上節目分享過往經歷。節目開首,作為主持的麥包表示自己為人父母,加上自身的童年遭遇,必定會身同感受。到事主Annie與承鋒兩母子講起經歷時,Annie已情不自禁講到喊。期間江美儀的口吻,就似三姑六婆上心,問:「點解你對自己個仔咁狠心?」直到Annie講起發現兒子吸毒直接報警時,問題就來了,節目無緣無故搞投票,問現場觀眾:「父母對子女狠心係咪恰當?」認真奇怪,感覺就似公審。而觀眾都一面倒支持Annie做法,更有人苦口婆心勸承鋒要聽話,就似家事放上檯,自小缺乏父母關愛的承鋒被人開刀批判似的。節目後半段,麥包都講起自身經歷:「我阿媽堅持,所以先冇將我送畀人,今日先可以坐喺度。」說罷,麥包都眼濕濕,整體氛圍就是煽情。

網民睇完節目之後,均對表現手法覺得反感。最主要原因是「家家都有本難唸的經」,沒有必要在節目攤開來說,整個節目應該鼓勵家庭溝通,並不是掏出傷心事,然後發放負能量。加上設有投票環節,讓當事人感到難堪。另一方面,網民認為觀眾大多是年老一群,自然地力挺父母一方,對任何人都不公平。紛紛表示:「睇完好沉重,晚晚喊苦喊忽,睇到人抑鬱。」看到節目預告,TVB找來事主多年沒聯絡的父親對話,觀眾再用言語對質,令其父親崩潰痛哭......再一次讓網民大呼一句:「不如叫《關我叉事》啦!人哋家事關我咩事呀!」

冇啦啦搞投票,用意何在?(影片截圖)
觀眾仲要苦口婆心勸導。(影片截圖)