【B仔涼粉】分店月前阻街遭釘牌 B仔搬舖至鳳琴街惹街坊爭議

撰文:
最後更新日期:

元朗美食多,但講到最出名的就是「B仔涼粉」,不少遊客都專誠慕名而來。反觀它在香港人心目中卻印象麻麻,更有許多元朗街坊都講過「元朗人唔食B仔」。其又新街分店自上年年中因「阻街」而被釘牌,儘管半年來仍繼續做生意,但今日(2月19日)起此分店將不再營業,遷往人稱「雞地」的鳳琴街新舖。有街坊就認為,搬舖只是治標不治本,甚至有雞地街坊直言擔心之後受噪音與阻街問題滋擾,記者就找來幾位B仔客人做街訪。

攝影:鄧穎琪

以B仔涼粉馳名的「佳記甜品」有一定名氣及支持度,更曾頂死惡鬥多年的同區甜品店「泛后甜品」,不過它在普遍人心目中形象兩極,除了獲遊客熱捧外,也有人會定期揸車入元朗品嘗其水果甜品,但「佳記」在部分元朗街坊心目中印象就麻麻,有睇開「食在元朗」facebook的朋友,都知道街坊經常強調「元朗人唔食B仔」,並常以「環保涼粉」來調侃B仔,諷刺店方疑似重用生果。幾日前,討論區就有網民圖文並茂表示,食「B仔船」時發現西瓜之中居然有粒釘,嬲爆謂:「痴X線!以後點都唔X會再食,差啲死!」衛生情況值得關注。

B仔素來以涼粉聞名,配上各種水果。(資料圖片)

另一道「名物」則是蒜香辣汁雞翼尖。

有網民開post鬧爆B仔涼粉內藏螺絲,使他非常憤怒,直言以後都不再光顧。(網上截圖)

然而,更值得留意的是,B仔有兩間分店,「舊B」在教育路大坑渠旁邊,另一間則是又新街分店,由於它經常搬出桌椅到店外加枱,上年6月就因屢次違反《食物業規例》(第132X章)有關非法擴展營業範圍的條款,持牌人被扣足180分,遭食物及衛生局取消其食肆牌照。縱然如此,B仔這大半年來依然照常營業,儘管最高刑罰足以令持牌人坐監,但當局並沒刻意執法,而持續違例者其實每天只需另加罰款900元,對經常座無虛席的B仔來說可謂濕濕碎,罰款當交租,一於你有你釘牌,我有我開舖。

又新街B仔門前疊有大量椅子,方便隨時加枱櫈,此問題亦是令到B仔遭吊銷牌照的一大原因。

B仔自晚上9點幾開始已經坐滿客人。

不過原來B記最近已另覓新址,今日起又新街分店將正式遷往俗稱「雞地」的鳳琴街,昨晚見到舖外大大塊Banner提到搬遷一事,記者視察過新、舊舖,亦訪問了街坊意見,發現意見兩極。

又新街分店店名上,掛了一幅「搬遷啟事」大Banner,提醒食客新店將於今日起遷往鳳琴街,此後有「新B」之稱的又新街店將不再營業。

有幾位從B仔步出的食客都表示之後會繼續幫襯,其中一對被訪者是Alex及其妻子,兩人本身在元朗長大,但婚後已遷出此區,只在回女方娘家後才偶爾到訪B仔,對搬舖一事,Alex說:「佢要搬都冇計,冇話好唔好。」他又透露店方多在11點後就會將枱櫈搬出舖外,「多人佢就搬,冇人理。啲車會、車隊好興喺屯門公路飛完車就入嚟食個宵夜。(搬咗舖你都會食?)應該都會,因為食咗好多年,同埋好近。」他指新店位置容易泊車,相信對生意額沒有影響,講到加枱櫈問題,他不諱言:「相信到時都會搬晒出嚟。(即係無視釘牌?)冇話無視嘅,如果佢無視『釘牌』就唔使搬啦,但應該都係拖得就拖。咁夜邊有人得閒嚟Check?你見條街其他舖頭都係開晒啲枱櫈㗎,又冇事嘅?我諗係側邊啲人又或者同行投訴,同埋聽聞依度好似話加租。」

記者實測過,從又新街分店步行往鳳琴街新店,路程約5分鐘內。

記者見到新舖頗為闊落,正有員工打點佈置,晚上10點,店主二人恰巧視察完裝修情況,準備搭貨Van走人,上前講了幾句。負責人指當晚將通宵裝修,但要翌日(即今日)大約黃昏時段才有食品供應。昨晚11點又新街店約8成滿座,無需另加桌椅,期間陸續有員工將物資搬去新舖。

新舖將於今日營業。

新舖看起來頗大,詢問過B仔員工,她覺得新店空間較四正及「見使」。

為了趕上進度,員工通宵留守打點。

另外,店主在新舖附近訪問了任小姐,她對搬舖一事不太滿意,原來她正是住鳳琴街附近的住客,「放假啲日子實塞住晒啲人喺度,晚晚鬼咁嘈!」問到覺得新舖會否一樣阻街,她說:「依邊條路其實窄啲,要搬都唔搬得幾多張,但係其實冇分別,多人起上嚟,積晒啲人喺度等位咪一樣,所以個問題根本冇解決過。」任小姐直言擔心衛生情況,因這裡平日已經有老鼠,相信開多一間糖水舖或會使鼠患問題惡化。

以下兩張圖展示出又新街B仔及新店鳳琴街B仔店外的空間,前者相對寬闊,而後者則比較窄,加上馬路邊有圍欄阻隔,相信屆時加枱數量會減少,但就未知牌照一事會如何發展。

其實B仔搬舖一事,在網上亦引起不少元朗街坊熱議,以下就節錄部分留言。

+6
+6
+6

【周五心意運動】您捐一封$50利是,已可為基層送上溫飽,01心意呼籲您支持【食德好】,每$50可為12個家庭提供一餐回收蔬果及食物



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。