【DSE免費考】考生千字文訴心聲:對「玩殘我哋」網民言論感壓力

撰文:
最後更新日期:

新出爐財政預算案,提出為參加2019年香港中學文憑考試(DSE)的考生代繳考試費,引起網民熱烈討論。免費當前,不少網民戲言要入場「搞事」,又有人希望考多次為自己「平反」!

網民熱烈商討是否報考DSE,另一邊廂當屆DSE日校生,面對突如其來的「喜訊」卻坦言無法消化,對於「全民DSE」熱潮更是心情緊張。有考生在facebook專頁「名校 Secrets」投稿,以千字文分享心聲,盼各位市民高枱貴手。

有考生在facebook專頁「名校 Secrets」投稿,以千字文分享心聲,盼各位市民高枱貴手。(名校Secrets FB截圖)

該名2019年DSE考生在帖文坦言,政府的一個「恩賜」,令不少身邊人絕望,「覺得自己短暫人生中最重要的命運」被改寫,而一班「口出狂言」、聲稱要「玩殘我哋」的網民是一眾考生的壓力來源。

考生亦引用韓國電影《與神同行》,表示各人要為自己言論負責,「網上嘅一言一語,其實對每一個人都有影響,我諗宜家係時候要停啦」。

免文憑試考試費的消息一出,引起極大爭議,財政司司長陳茂波昨早(1日)出席電台節目時稱問題不大,但下午出席立法會財委會時則改口風,被問到措施可否只限日校考生,改稱會再作研究。

財政司司長陳茂波昨早(1日)出席電台節目時稱問題不大,但下午出席立法會財委會時則改口風。(資料圖片)

以下為facebook專頁「名校 Secrets」的「2019DSE」考生心聲全文,內容經《香港01》編輯加入標點及修改廣東話用字。

===================

【2019DSE】冇錯,又係我呢個所謂學霸,又係我呢個五萬人入面嘅2019DSE考生,亦即係網上好多人揚言,要我哋入唔到大學嘅零零後。

噚日唔少群組、IG上都出晒2019DSE唔使錢嘅消息,同好多考生一樣,先係開心,覺得財政預算案終於關我事;之後係擔憂,擔憂咩?相信好多人都明,我哋要面臨更加大嘅考生競爭!

網上唔少言論,揚言要「玩殘」我哋呢班佢哋口中嘅廢青,話唔使錢不如大學生、出嚟做嘢嘅人,入去考翻一次。

今日返到學校,最轟動依舊係呢一個「喜訊」。2019DSE唔使錢,係天跌落嚟嘅禮物,定係個天跌咗落嚟?成為我哋全班同班主任嘅討論話題。即使我哋幾唔想承認DSE係要同自修生一齊考口試、要同自修生一齊爭JUPAS,我哋都要向命運低頭。

身邊越嚟越多人絕望,覺得自己短暫人生中最重要嘅命運決定,因為政府一個「恩賜」而改寫。

同學們怕,怕考中文口試隔離,坐住補習名師、坐住位準備講英文嘅考生;怕考writing比個marker覺得自己文筆比唔上日日作文嘅專欄作家、英文水平高過自己嘅大學生(不喜勿插)。

雖然係「水平參照」,但對我哋嚟講,佢只係一個一試定生死嘅遊戲,我哋其實唔係怪政府「變相派錢」去幫助窮苦學生,我哋嘅壓力,其實係源自一班「口出狂言」嘅人,一班聲稱要「玩殘我哋」嘅網民。

無錯,言論自由係相對嘅道理,但係言論自由總有一個底線,作為一個受而家社會最大壓力嘅2019DSE考生,我哋好怕自己未來真係斷送喺呢一班「玩嘢」嘅「考生」身上。即使香港人係如此善忘、即使唔係所有人都真係會去行動考DSE,但係呢一日網上嘅言論,話我哋不斷鬧其他自修生,話我嘅唔想再相信DSE既遊戲,其實令我哋千夫所指,呢一小部分2019DSE嘅考生 其實同樣活喺DSE嘅壓力之下,網上嘅言論,其實只係徒添我哋嘅壓力。

唔知各位有冇睇《與神同行》?《與神同行》帶出過一點:我哋要為自己嘅言論負責。喺網上嘅一言一語,其實對每一個人都有影響,我諗,而家,係時候要停啦!

「2019DSE免費」已經成咗定局,我哋呢班學生亦都要繼續面對下一年更大嘅挑戰。的確,作為一個中產,DSE免費對我影響唔係話非常大,算係減輕屋企人嘅負擔,但係有一班學生,面對緊解決唔到三餐嘅問題。呢一個的確係一份天賜嘅禮物,但係,我哋收到呢一份禮物嘅同時,又係咪要受到社會上嘅千夫所指?又係咪要因為滿足社會上嘅聲音而需要賭上自己一生嘅前途呢?

2019 DSE fighters 共勉之

立刻Like!讚好《01熱話》:


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。