【熱評】如在大排檔傾心事 3個原因睇杜汶澤喱騷

撰文:
最後更新日期:

文:陸小菲

小菲好耐之前就係Chapman To嘅粉絲喇,當年《我和殭屍有個約會》嘅時候小菲咬住奶咀背嗰段情深深的對白雖然而家已經煙消雲散一個字都唔記得,但any肥,亞洲電視嘅事又有邊個會記得吖。小菲今日想講嘅係杜導嘅Late Night騷。

杜汶澤(中)定期在facebook上載節目,早前請來盧覓雪、貝依霖及江若霖等人坐陣。(fb專頁「杜汶澤 喱騷 Chapman To’s late show」圖片)

近年杜導多咗光明正大地同唔同人交惡,對頭人多咗,自然搵佢拍戲嘅人就相對少咗。無去大陸拍戲,杜導就有更多時間關心香港大小事。上至開火鬧人,下至開爐煮嘢食,都無失禮。唔返大陸搵人仔咪自己開戲拍,唔同老婆一樣做電視咪自己開台;搵食可以有好多方法。

自己打開道門用自己揀的角度面對觀眾(個角度可能係影到隔離位個心口的高度)。如果係要人哋煮到埋嚟餵你食嘅人可能唔會鍾意杜導,但係如果你鍾意睇白手興家做實事,你可能會鍾意佢搞呢鑊一星期三次嘅杜汶澤喱騷(Chapman To’s Late Show)。然而,當睇到佢地識得搵高登去搞首主題曲,PR就已經贏咗一半啦。

小菲時差,噚日先真正第一次睇《今晚poke嘢夜唔夜》。Live唔live我真係唔在乎,電話觀眾有無造馬我都唔介意,杜導加雪姐的火花已經可以一睇(中間阿doctor講自己啲case出嚟嗰度我真係唔知有無私隱問題,不過,okay I don’t mind,重點仍然係杜導度)。除咗每次個鏡頭影落杜導嘅時候都會影到側邊個心口之外,小菲都想講吓3個值得睇嘅原因:

杜汶澤製作電視節目在網上播放,成為傳統電視外的另一選擇。(fb專頁「杜汶澤 喱騷 Chapman To’s late show」圖片)

1.如果你無阿媽畀你人生教晦,不如聽杜導同你談人生

特別記得杜導講咗句:「千奇唔好諗人哋諗啲乜」;呢句同小菲老母的教導同出一轍。講嘢難聽嘅人可能會話陳腔濫調,但其實呢啲嘢真係有心人先會袋落你個袋。事實你幾時見到有明星公開接call同你傾點做人之餘hardcore得嚟又真心。有邊個可以唔顧形象同你傾出真性情?(well,你可能會質疑佢係做騷,但就算係偽人擺出來的螢幕偽性情,小菲都buy呢一款)呢個係小菲睇過香港近年最唔避忌嘅節目。亦應該話,杜導平時都玩開咁大,仲有啲咩要避忌?

杜汶澤喱騷題材大膽,訪問對象包括用下體做畫筆的澳洲畫家。(fb專頁「杜汶澤 喱騷 Chapman To’s late show」圖片)

(2)借個平台去睇香港地人生奇觀

等同收音機嘅年代,打電話去電台講心情嘅聽眾。不過今次唔同嘅係,由杜導用聲同畫去摑_醒你。先唔好理有心事者係唔係奇人奇事(女朋友做援交係唔係三觀不正都好),有雪姐奇奇怪怪咁同你提出新女性觀點,再由杜導以男性角道大膽抽擊嚟個對談;TVB 大台已經唔能夠做到呢種 level,ViuTV 講性話題算係開咗大眾大路的先河,但好多藝人都有自己嘅局限;要打開香港地的人生奇觀,耳聽八方,再用一種喺大排檔同你傾心事嘅方式去打救你嘅節目免費定時出現?點計你睇完都係賺咗。

杜汶澤的另一個節目是《日本風涼話》。(fb專頁「杜汶澤 喱騷 Chapman To’s late show」短片截圖)

(3)是時候stand up for sth了,你唔敢企都想有人敢為你企

大膽嘅題材唔係度度都敢做。年紀細嘅話可能入世未深唔知點處理,年紀大嘅又要顧全面子唔知點面對;所以其實好多嘢都應該拎出來大膽,講唔好再矜矜持持了。講出嚟未必有改善,但鬱埋鬱埋就真係可能會病;萬一自己一個收收埋埋諗埋一邊就唔好啦。可能係因為好多人好多嘢佢地怕拎出嚟講會畀人覺得廢而唔敢開口,咁而家有個地方睇下世界上其他故事,做下case study 都算係自救辦法;大家嘻嘻哈哈笑一場,心理壓力又細返。咁就算唔打上去搵杜導盡訴心中情,都可以借聽別人故事來春風得意一下畀塊借鏡自己吖。

最後,小菲其實都係想講,呢種話題同風格都應該有屬於自己的舞台,而杜導都找到適合嘅出口。至於日後發展係點,又或者大家趁完噓之後發現其實都唔係咁fun都有可能。杜導鹿就捉到了,小菲等睇佢為整個香港電視show脫角。至於會唔會後勁不繼?就要睇杜導嘅持久力喇,小菲當然持正面觀望態度啦。

最後嘅最後,綠茶婊小菲除咗想要應徵做專家級澤女郎之外,就別無它想了。

陸小菲facebook:陸小菲 Fifi Luk 與某種憂鬱的聲音

(文章純屬作者意見,不代表香港01立場。)
立刻Like!讚好《01熱話》:


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。