【熱評】消失的角球？ 英超球迷買中無得賠 向馬會追討近5萬元
（編按：英超於今年3月11日上演「車路士對水晶宮」賽事，英超官方最初指有14個角球，其後更正是15個角球，馬會則依照官方最初公布的14個角球派彩。一名球迷不滿馬會未有依照英超最後賽果派彩，令他買中也沒有獎金，日前入稟小額錢債審裁處向馬會追討48,750元獎金，案件押後至5月28日再訊。）
文：李聲揚
常言話賭仔姓賴（其實係指賭徒唔肯面對現實，「性」賴），賭錢嘅，買大開細就夠晒慘。咁有咩慘過買大開細？就係買大開大但冇得賠！
咩回事？一單唔起眼嘅新聞，有位球迷（或賭徒）去小額錢債審裁處，追馬會錢，都成五萬蚊，唔係細數目。
點解追馬會？原來話馬會出錯，佢買中場波但冇派錢畀佢。場波係3月頭一場英超，車路士主場2比1擊敗水晶宮。呢位球迷買咗「角球大」，即係15個角球或以上就收錢。但馬會話場波得14個角球，冇派錢畀佢。
角球數字點計？
咁都得？14定15都有得拗？真係咁都得。好彩呢場唔係非洲某小國嘅聯賽。 而家科技先進，仲要係全球最受歡迎嘅英超，場波有晒直播有晒錄影，14個定15個角球，上庭數一次咪知咯，係咪？
首先留意一樣嘢，有人問，如果完場前冇耐球證吹咗雞，話有角球，但開嗰隊搞一大輪慢吞吞，未開到角球就吹雞完場（球證絶對有權咁做，亦都試過咁做），咁點計？馬會寫得好清楚，投注項目叫「角球大細」，但入面有講明係「合共開出的角球總數」，寫到明計「開出」。正如英文版佢都講係 Corners Taken，唔係Awarded。總之個球員開咗就計，開完個波在空中球證吹完場都計，但未開就唔計。有人話呢個唔公平，有啲外國網站係計Awarded，但馬會一早講明在先，並無唔妥。
但今次爭拗唔係呢樣嘢。有連登仔好用心咁重睇一次，貼返晒每一個角球出嚟，真係15個喎，冇理由有錯。肯定個15個角球全部有開到，唔使拗Awarded定Taken。唯獨係有一個角球，開嗰時鏡頭影咗去第度，咁可能漏咗啦。
咁都得？你心諗，馬會咁大間公司，唔係整條友睇電視自己數波波咁山寨下話？事實上馬會應該係有人睇住場波（否則開唔到「即時投注」，即係俗稱「走地盤」）。 但，就唔使原始到搵個人數角球嘅。
馬會派彩睇即時結果
重組案情後，問題就似乎出自英超賽會。不少球迷都話英超出名多盲人球證，呢場可能都係球證數漏。原來英超官方嘅賽後報告，原本都係話14個角球。 後來應該有人發現數錯， 就改返做15個角球。
馬會派彩，就唔使自己睇電視，係跟英超官方賽事報告嘅（聰明之舉，反正人哋先係官方，有事亦唔使上身）。 咁你話，既然英超官方都改返15個，馬會唔係應該照跟？ 呢度就出問題了。 我唔係幫馬會（陣間會鬧），但諗下實行起上嚟會點？英超官方賽事報告，賽後冇耐就會出。馬會就跟呢個數字，即時派彩。咁你官方賽事報告之後先改返，馬會點追返派晒錢返嚟？今次就話咁啱半夜。下次係日頭嘅，你拎埋錢走埋啦，點追？
正如都有人提到，熱刺前鋒哈利簡尼（Harry Kane）早排上訴成功，原本官方話唔係佢入嘅波都判返畀佢。但買咗「首名入球」嗰啲當然冇得怨，只能跟當時官方報告。除非大家接受到一切嘢過晒上訴期（而我唔知有幾長）先收錢咯 – 但明顯絶大多數賭仔都唔會肯等幾個鐘甚至幾日先收錢啦，係咪？
網民亦都拎返早排另一場波嚟講，係舊年一場南韓職業聯賽（韓職），全北汽車對FC光州。場波係全北贏3比1，但馬會唔知做乜當咗4:1咁派錯錢。有啲網友就買錯但照收錢，十分開心 – 開心咗一陣。馬會冇耐就發現出錯，更正返係3:1，然後派咗嘅錢在戶口扣返。當然你叻仔現金投注去拎咗錢嘅就追唔到你，或者你夠醒目一早轉走戶口啲錢，都奈你唔何 – 不過你個戶口會變咗負數。 咁係咪以後唔用呢個戶口就追唔到你數，就真係問下法律界人士先知。
網民就拎呢場韓職嚟比，話之前馬會改賽果就可以彈弓手扣返，做乜今次又唔可以事後補救？係咪輸打贏要？我認為，馬會的確十分核突，但兩件事真係唔係同一回事。韓職，從來官方都係3:1，馬會只係可能人為錯誤派錯 – 但唔等於嚿錢係你的。即係你諗下銀行唔小心轉多咗錢畀你，你係咪可以拎走而銀行冇權追返？梗係唔係啦
只能怪英超球證發雞盲
今次呢場英超，打到上法庭（小額錢債審裁處啫）。我問過下法律界人士（即係， PM同律師朋友吹咗幾句水，當然唔係正式法律意見），就咁表面睇嚟呢，馬會應該唔使賠錢的。唔係霸道或乜，而係真係一早寫明跟官方「當時」結果派彩。怪，就怪英超官方賽事報告咁求其，怪個球證發雞盲咯。似乎又冇理由要馬會上身。
揸正嚟做，就應該係咁啦，法律上我估球迷/賭徒今次應該告唔入。但又話說回頭，法律還法律，成件事，畀人嘅感受係真係好不公義。喂，明明我買中喎，做乜都冇錢賠？球迷一定會咁諗。而馬會只能講句sorry，我都唔想，怪就怪英超球證。所以成件事係不幸事件。
但如果外國，你估會點解決？我估，賭波公司會照賠錢，皆大歡喜。事實亦有賭波公司試過咁做。等於大家成日講咩「公關災難」，公司咪當少少錢博宣傳，話畀大家知「我好大方，法例企我嗰邊我都賠畀你」，吸引多啲賭仔嚟賭，長線點都除笨有精。
但馬會，應該都係睬你都有味，唔會咁做啦。點解？因為根本唔需要。馬會根本唔需要「吸引你」賭。因為佢獨市生意，壟斷晒成個市場。2003年我親眼見證賭波合法化，但與其話係規管，不如話係畀馬會獨大。而家你買外圍之類當然係犯法，但即使你幫襯外國投注網站，一樣係犯法的。本地信用卡都唔會畀你過到數，當然你有外國信用卡或者以前在英國開落個戶口有好多錢就另計。
結論：我十分同情嗰位買中咗都冇得賠嘅球迷/賭徒。因為擺明真係15個角球，官方最初出錯，而家都改返15個。但馬會有條文在手，又唔怕趕客，好可能唔理你，無得賠，實屬不幸。