好人好事！有女生離港前一晚到海底撈吃宵夜，翌日早上準備前往機場時，發現裝有護照、身份證的斜孭袋「唔見咗」，猜測遺留店內，遂要求Uber的士司機先前往海底撈，但對方指因塞車，停下等候再往機場有機會「趕唔切飛機」。司機於是提議她致電海底撈職員，請對方幫忙拿到樓下交收，結果「姐姐」店員二話不幫忙「我即刻拎落嚟俾你」，樓主最終成功抵達機場，因此發文表示感激。

不少網民都替樓主緊張，「真係睇到腎上腺飆升呀」，又讚揚港人熱心助人精神，「一連遇兩個好人」、「好彩個個都肯仗義相助」。不過有意見批評樓主「太老定」，「10點45分飛機，你夠膽死8點幾先起身？」。

離港前到海底撈吃宵夜　護照遺留店內

「人間有愛，好人一生平安」，該女生在threads分享，她離港前一晚和朋友到油麻地海底撈吃宵夜，離開時已經正值深宵，回家睡約2小時，8時許便要起身準備前往機場，搭乘10時45分的航班。當時她電召Uber打算直達機場，詎料出門才發現裝有護照和身份證的斜孭袋不見了。由於她翻遍家裏和座駕都未有找到，估計「多數留低咗喺海底撈」。

女生趕飛機心急如焚　感激海底撈店員這樣幫忙

樓主即時致電海底撈，職員確認她遺留了手袋，形容當時「真係十萬火急」，立刻和Uber司機要求更要改目的地，先往海底撈取回手袋再去機場，但司機指因為彌敦道塞車，難以停下等候，更表示「仲有機會趕唔切飛機」。樓主當下不知所措，司機於是安慰並提議她致電海底撈職員，請對方幫忙將手袋拿至樓下街口再交收。

司機如「拓海上身」　成功抵達機場

海底撈職員聞言二話不說答應：「得！陣間你到咗打俾我，我即刻拎落嚟畀你！」Uber司機亦知道時間緊迫，樓主稱對方「見到佢手軚轉左又轉右，真係拓海上身頭文字D咁趕路」，最後有驚無險成功抵達機場，還有時間辦理登機手續，驚呼「真係鬆一口氣」。

許多網民大讚海底撈職員和Uber司機，「真係睇到腎上腺飆升呀，好彩個個都肯仗義相助，呢啲就係香港人精神」、「一連遇兩個好人」、「平時香港人最鍾意投訴，但係緊急情況下服務業仗義相助，真係要識得感恩」、「出門遇貴人，你真係要好好用實質行動表揚佢哋」、「至少寫個email表揚下人」、「Uber司機更要好好打賞呀！」另有人覺得樓主太大意，「第（二）朝要搭飛機，前一晚帶埋有護照嘅斜孭袋去海底撈宵夜？」、「可以個袋唔見一晚都唔覺，勁啦」、「咁重要嘅野都漏」。

網民批樓主太大意：好彩個個都肯仗義相助

有留言指樓主似乎過於「老定」，「唔知你住邊， 不過中間仲要走一轉油麻地」、「10點45分飛機，你夠膽死8點幾先起身？」、「你起身已經是check in時候喎」、「你一定係個好P（隨性）嘅人」。

（threads＠wingheic_）