【情人節】毒男想出pool? 陳澤滔教你追女六式

撰文:
最後更新日期:

身為一個有情人的毒男,陳澤滔可有追女秘技?陳笑言「毒男……有時都唔知佢哋諗乜」,寄語一眾希望「出pool」的男孩們,「最緊要自然啲」。今個情人節仍是單身,希望下年情人節有情人?不妨看看陳澤滔的數點建議!

陳澤滔教路,若毒男想認識女性,最重要是自然。(周詠雯攝)

1. 勿自我標籤毒男

「有好多毒男好鍾意包裝到自己係一個毒男」,陳澤滔不諱言對此感到奇怪。「係咪成日都要話自己好慘、自己係毒男?其實對改變形象無幫助」。他指,不少毒男陶醉於情人節時標榜自己是個毒男,此舉反而是錯誤,「老實講對女仔嚟講唔係啲咩吸引力」,直言不明白為何部份毒男會以恥笑自己去獲得快感。

【情人節】相戀七載女友願捱劏房 「毒男」陳澤滔嘆對她有所虧欠

2. 與女性相處要自然

「假如你係正正常常嘅男仔,我又唔相信你搵唔到女仔囉!」那麼脫毒訣竅為何?「你真係想脫毒,就要改善自己心態」陳澤滔說。

陳指,不少社運界人士稱「唔想害人」已拒絕與異性有進一步發展,他稱不認為「搞社運就一定要斷六親」,「最緊要自然啲」,若待人做作,又會令人感到奇怪及虛偽,「男女相處唔好睇得係咩一回事,自然啲就會舒服啲」。他又指,「有啲男仔見女仔就好緊張,同男仔就暢所欲言,有女仔就靜哂」。他又指亦有一些男性認為自己是毒男,亦會顯得自卑。陳認為男士們不用特意建立某些形象,「做返自己正常嘅時候係會好啲」。

3. 交友時勿帶企圖

「啲毒撚……有時都唔知佢哋諗乜……」他指不少毒男認識女性時已有企圖,只願與心儀女性談話聊天,「呢個世界唔係咁㗎嘛!」他指出,平日認識異性朋友「都唔係啲咩嘢啫」,告誡一眾毒男們:「識女唔係為咗溝女,唔好咁猥瑣啦!」

陳澤滔指,男性交友時不需有特定企圖。

4. 勿定型「所有港女也拜金」

拜金女的故事不時出現,亦有人會在討論區討論「港女是否拜金」等議題。陳澤滔直言「覺得係一個偽命題」,他認為,雖然香港確實有拜金女,但亦非特別多,「只係煲大咗,唔覺得好多係拜金」。

至於不少女性的擇偶條件是男方擁有私人物業,陳澤滔則認為「窮係一時,個人係咪大花筒、去唔去考慮未來」亦相當重要。他以自身舉例,雖然自己在社運中花費一筆金錢,但「都唔會成世買唔到樓」。

5.  溝通有技巧 WhatsApp忌只覆笑臉

若已經成功「抄牌」取得女性朋友聯絡方法,溝通時又有何要注意?陳澤滔指在收發WhatsApp短訊時亦有技巧,「唔好要啲人淨係答yes no question、唔好淨係reply人個笑臉」,最好可回覆三數句,讓討論得以延續,長講長有。

不時開街站與街坊交流的陳澤滔亦指,與別人溝通時切忌立場強硬,「溝女定做街站,其實我都唔知自己嗰套係咪真係正確」。他稱應抱著聆聽者的心態去了解對方想法,並試在兩者之間尋找共通點,再找共同話題。他亦笑言「係咪跟住陳澤滔路線就點點點先?唔好淨係得個話字」

6. 平日與女性朋友多溝通

Be prepared!陳澤滔提醒,毒男們平日可與女性朋友多作溝通訓練自己,「勇敢啲,都唔係一件好苛刻嘅事嚟啫!」再者,毒男們平日亦應定期檢視自己,「唔好等到見到心儀女性先改善,太遲喇!」

至於是否需要為「溝女」而大變身?他指「衣着當然執下係好啲」,需要分清楚「生活係喱啡定係毒?」但亦同意「執正啲」會令對方更易接受自己,不過他提醒一眾男士,「但最重要都係個性同態度」。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。