【郊野景點化】梁美芬建議嘉頓山建升降機 陳劍青批呃老人家票

撰文:
最後更新日期:

行山都要搭電梯?有組織發現立法會議員梁美芬詢問政府會否在深水埗「嘉頓山」興建升降機或觀景台,批評梁美芬此建議「想呃隔離啲老人家票」。

梁美芬回覆《香港01》指,此建議「只係希望老人家去到,無其他原因」。

梁美芬詢問發展局會否在嘉頓山興建升降機。(資料圖片)

本土研究社成員陳劍青今日(30日)在其facebook發文,指梁美芬在財政預算提問中,詢問發展局會否透過「保育歷史建築基金資助活化歷史建築伙伴計劃」,於嘉頓山興建觀景台及升降機,稱「讓居民及遊客欣賞深水埗日夜美景」。

陳劍青發帖時直言「O哂嘴」,認為嘉頓山是深水埗的後花園,形容「山本身就係一個觀景台」,反問「做乜又要劃蛇添足又在觀景台起多個觀景台?」陳又批評梁美芬此建議並無考慮到實際需要,認為山野景點化,只會帶來破壞。

梁美芬:係咪得精壯嘅人可以去?

梁美芬接受《香港01》訪問時指,自己由始至終「只係希望老人家去到,只有一個原因」。她又指深水埗區只有嘉頓山是「靚嘅地方又唔係好遠」,反問「係咪只係得精壯嘅人可以去?獨居老人就要自己屈住喺屋企?」梁美芬認為在嘉頓山加建升降機後,長者獨自亦可上山看風景,強調「要諗下後生仔同老人家係有分別」。

至於加建升降機後,嘉頓山會否被破壞,梁美芬指人潮「未必係想像中一日到黑都去」;至於被指此建議為吸長者選票,梁美芬則指「都未爭取到,佢哋咁樣係好唔公道」。

毛孟靜:行山唔係返屋企 不需加升降機

同屬九龍西選區的立法會議員毛孟靜指,自己亦上過嘉頓山,認為嘉頓山現時已經有路徑,加上該處「係行山吖嘛,又唔係返屋企」,認為正常香港人到該處行山,亦不需要加添升降機。毛又指,香港不少風景均是渾然天成,遊人到香港亦會希望觀賞真正自己環境,認為「愈人工愈假,景點愈少人為元素愈好!」

陳劍青發文後,不少網民在帖文留言及分享帖文,稱「尊貴嘅梁議員有無上過嘉頓山?」又反問「喜馬拉亞山幾時有電梯?」認為梁美芬的建議多此一舉,破壞原有美景。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。