【不懂撒嬌的女人】編劇大爆料:原本安排游生同Saving爭女

撰文:
最後更新日期:

號稱4K及全實景拍攝的《不懂撒嬌的女人》今日迎來大結局,一直說要打破傳統框架,究竟最終又能否逃過「BBQ、跳起Yeah」的命運,會否帶來耳目一新的景象呢?

一套劇集成為城中話題,幕後製作人居功不少,《不懂撒嬌的女人》兩名編劇李昊(阿花)及陳玉瑩(Mint),分別入行十三年及一年多,她們向記者述說劇中點滴,又爆料指原本游生會跟Saving爭Cherry!而且Mall姐原來中學做過Head Prefect。

究竟Saving跟Cherry能否結婚?大家都要拭目以待。(《不懂撒嬌的女人》劇照)

結局是否有如網民所言為一貫套路?首席編劇阿花說「絕對唔係BBQ、跳起Yeah」,她指跟其他編劇都有參考網民意見,思考劇情發展時均會認為不用太過直白,對白均會點到即止,「我哋都知道觀眾已經成長咗,個tone唔使咁白」。至於Saving(王浩信飾)及Cherry(唐詩詠飾)最終能否結婚?阿花不願劇透,大家惟有今晚拭目以待。

編劇:唔需要老闆追職員呢種fantasy

不過初級編劇Mint就踢爆,原本劇組有想過安排游生(袁文傑飾)介入Saving及Cherry的感情線,但多番考慮後,認為這套劇不需要有個百億身家的老闆去追求小職員這個fantasy(幻想)。

【不懂撒嬌的女人】做編劇先要過三關 睇劇討論劇情定考反應?

 

而賤Han(黎諾懿飾)跟純純(張瑋純飾)的感情線,最初亦不在預算之中,「去到最後,佢嗰個感情線,我哋突然覺得佢可以同某個角色拉埋一齊㗎喎……本身佢有好多個發展方向,我哋曾經有諗過賤Han會唔會同Mall姐(宣萱飾)有感情線嘅」。不過Mint說創作人物後,各角色也有自己的生命,會有自己的演繹及發揮,所以後段的發展其實不用劇組過度「介入」。

一眾編劇及編審合照,前排左為編審朱鏡祺,前排右為Mint,後排右為阿花。(受訪者提供圖片)

踢爆賤Han取自身經驗:睇相發現有古怪

《不懂撒嬌的女人》編審朱鏡祺就向記者爆料,指劇中賤Han角色由阿花的經歷中抽取,阿花先是一輪大笑,「其實唔只係我,大家同事都有貢獻好多(自身經歷)。每個角色我哋都盡量會賦予多啲嘢畀佢。咁賤男……成世人流流長,總會愛上幾個人渣」。她指自己都曾經像Cherry一樣,在社交媒體上發現另一半的照片「有古怪」,追看之下看到他有不少跟女性的合照,「都係呢類嘅自身經歷擺落去。而我遇賤男嘅經歷比較多,好不幸地,所以都盡量講」。

在港視創作《警界線》後重返「娘家」的阿花,感到無綫希望革新,今次《不懂撒嬌的女人》劇組均有不少向外闖後回流的工作人員,大家都冀盼為新作品加入新元素。阿花指今次劇組特意加入「圍讀」這部分,「以前TVB比較少嘅,今次製作部好堅持、好希望做多少少呢樣嘢。大家一齊喺排舞室圍讀,可以畀演員好快入戲,或者即刻改善到,唔係嚟到(片場)就即刻開工」。

有啲朋友反映番「呢場戲真係好似我」呢類反應,我哋都會好開心,因為我哋都挖晒我哋啲嘢出嚟,希望(觀眾)睇嘅時候都會笑中帶淚。
無綫首席編劇李昊(阿花)

5月22日的慶功宴上,台前幕後工作人員合照。(受訪者提供圖片)

為人物描寫花更多時間、工夫

即使是劇本創作,阿花也感到今次劇組非常認真。阿花說她們準備「人物小傳」都花更多時間及工夫,盡量將各個人物描寫得更為立體,塑造一個活生生的人,盼令觀眾覺得很「貼地」,「有啲嘢唔會喺劇集嗰度表現出嚟,但係我哋都有諗埋。譬如話Mall姐究竟係咪喺中學嘅時候做過Head Prefect,導致佢有今日咁嘅性格呢?」為人物構想歷史,從而令其言行更有說服力。

加入無綫至今只有年半的Mint,也同意公司積極求變,亦相信4K製作、使用電影器材會是趨勢。改變背後,她感覺公司有危機感,「大家都唔會想靠慣性收視,睇番今年收視都係跌緊。收視跌咗好多,除咗因為網上睇,都反映觀眾流失。大家都會諗多啲方向去攞返啲收視,同埋都會見到有求新嘅方向」。今次觀眾多了一群年輕人,她也希望這個現象會持續。

Mall姐(右)性格強悍,中學會否就是Head Prefect?(《不懂撒嬌的女人》劇照)

年青編劇:因為《大時代》重燃電視劇之火

《不懂撒嬌的女人》屬Mint的第一套無綫劇,前年12月加入劇組,去年8月底完成最後一集劇本,至今日大結局,中間經歷一年多的過程。她坦言最初期望不高,對於今次引起網上很多討論感到很高興。因為《大時代》而重燃電視劇之火的她,期望自己日後參與的劇集可以如《大時代》般回應時代需求,令市民重返電視機前,再重新愛上看電視。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。