陳奕迅新歌《放》科幻微電影 到底參考咗幾多套科幻片？
呢個年代最有效嘅植入式宣傳方法就係靠微電影，賣廣告會拍微電影、拍MV又會拍到好似微電影、宣傳新歌又會拍微電影，所以陳奕迅新歌《放》就一次過滿足晒幾個願望，以新歌《放》為題拍咗套微電影，順手幫客戶「直入式」宣傳。
今次呢套微電影開宗名義為啤酒品牌作宣傳，更找來廖子妤及2016年全球排名首25位的DJ Alok於微電影中演出。話晒都係一套國際級水準嘅科幻微電影，所以就搵嚟荷里活影業巨頭CAA主理，老老實實，雖然只係一個廣告，但科幻感十足大製作。
但睇睇下，喂唔對路喎，點解咁多場口都熟口熟面嘅？唔通荷里活級數嘅微電影，連啲人設場景都係直接參考返荷里活嘅大作嘅？先講講人物服飾方面，一開頭會見到廖子妤一眾未來世界嘅人類，著住一式一樣嘅灰色服裝，雖然喺呢度不得不讚廖子妤個樣的確幾有「未來」同「科幻」嘅味道，不過套衫就真係不期然令人諗起《飢餓遊戲》同《分歧者》入面嘅角色造型。到底呢套灰色制服係參考咗幾套科幻大作，定真係未來嘅大趨勢呢？睇嚟我都應該入返幾套灰色衫擺喺屋企，咁就夠晒潮啦！
可能你會話，齋睇套衫就話人哋抄嘢都好唔公道啫，星戰夠係有啲軍官著灰色軍裝啦，唔通其他科幻片又抄佢咩？好！又同大家睇吓微電影嘅其他細節，劇情講到女主角廖子妤為咗避開追捕，走咗入一部升降機，而呢部升降機「啾」一聲就將廖子妤帶到去地球嘅另一側，仲入咗間Club聽DJ Alok打碟。嗱！問題就出喺部升降機度啦！唔知大家有無睇過2012年版嘅《Total Recall》(新宇宙威龍) ，入面正正就係有部「天梯」可以比人類穿越地心，去到地球另一邊返工。而微電影當中廖子妤所搭嘅電梯，係同《Total Recall》部天梯幾乎一樣！不過老老實實，深信唔少睇過呢部電影嘅人都幾鍾意「天梯」嘅設計，而呢部「天梯」放返落去今次Eason嘅微電影當中，又的確係幾合適嘅。