【專訪】《中國有嘻哈》入屋 本地rapper Heyo 捱十年北上挑機？
內地節目《中國有嘻哈》捲起一股Hip Hop熱潮，人人口頭禪都變成：「你有Freestyle嗎？」但早在節目出街前，香港已經有一班Rapper默默耕耘做Hip Hop，而Heyo就是其中一人。雖然香港市場仍未將Hip Hop視為主流，但Heyo月前推出歌曲《盛夏的舞》的MV，歌曲中featuring衛詩，哪觀眾又會如何區分「主流」、「地下」，還需要那麼壁疊分明嗎？
攝影：黃國立
再現「Hip Hop熱」？
《中國有嘻哈》出街後令Hip Hop音樂再次進入主流觀眾耳朵，彷彿Hip Hop再次變成潮流？堅持玩Hip Hop十年的Heyo對此有何看法？Heyo的態度是：「對我嚟講Hip Hop唔係潮流，我都做咗10年，我本身唔會有潮唔潮流呢個諗法。」
「Hip Hop文化」一早已在香港存在，但近日突然被炒熱，是否反映香港受眾只會跟風？Heyo認為這與香港的教育有關：「係嘅，佢哋好少接觸音樂、多元文化嘅機會，一興起就變成潮流；同埋都關教育事。好似外國人細個就有得接觸音樂，但香港嘅家長好多就俾接觸細路古典音樂；學習模式都唔同，學古典跟譜彈，但外國就着重數理邏輯、自由發揮。」
《中國有嘻哈》中製作人的資格一直是網民討論的焦點，而吳亦凡更是被「針對」的對象，Heyo對幾位製作人有何感覺？
「我會覺得佢後面有好多商業考慮嘅，可能吳亦凡後面同呢個節目製作部門有關係，你唔知㗎嘛！張震嶽嗰啲位又冇咩嘢嘅，因為佢都係一個製作人，雖然佢唔係Rapper，但係佢都會製作Hip Hop音樂，幾好㗎反而！因為可以由唔係咁inside嘅角色睇番一啲inside嘅嘢。由以外或附近嘅範疇去睇番Hip Hop呢樣嘢，都係一種多角度思考嘅象徵。」
《中國有嘻哈》玩反滲透？
經常都會聽到有人話「冇歌啱聽」、「依家啲歌都唔知唱乜」等等的聲音，而且大多都出自長輩的口中，是否意味年輕音樂人不受重視？Heyo卻認為不用氣餒，只是現階段會艱苦一點：「音樂如果有『反滲透嘅能力』就更加勁，如果可以令到長輩都會聽都係好處。就好似《中國有嘻哈》出咗嚟將會有好巨大嘅轉變，一定有好大嘅轉變！因為佢令到一班長輩，甚至年青，十幾歲嘅人會再接觸呢個文化！呢個以往被稱為『次文化』嘅Hip Hop將會向主流行咗一大步！你睇番《Show Me The Money》就知，喺韓國已經同主流混為一體。」
睇《中國有嘻哈》如睇「三國」
《中國有嘻哈》節目如此聲勢浩大，Heyo也有留意而且覺得像看「三國」一樣：「入面有個選手叫『鬼卞』，擺到明佢係有Style啦！佢玩緊嘅係Core腔『嘔泥聲』嘅Rap喎；仲有我鍾意阿Gai，佢哋兩個根本就係奇才。阿Gai係玩緊『道家Hip Hop』，用道家嘅詩詞歌賦喎！鬼卞又係正！佢係一個小學語文老師嚟㗎嘛！幾吸引呀佢個身份！所以我依家睇上面好似睇緊『三國』咁款！」
用三國去形容內地的Hip Hop分佈，頓時有畫面，亦更易理解，Heyo續道：「蜀國嗰邊玩緊嘅成都話係點嘅呢，有啲西域啲嘅感覺嘅！官府啲嗰邊，南方廣東嗰邊又玩咩Style呢？我依家係咁樣睇佢哋！」
「另外你又睇到官府嗰邊『輝子』佢哋，以往中國Hip Hop嘅battle係勁到去武漢㗎咋，跟住就北京、上海官府啲嘅Hip Hop。到最近Trap爆起上嚟，成都、霧都嗰邊嘅Hip Hop，都係兩種形態嘅Hip Hop，仲有啲零散啲Reggae啲嘅Rap好似潮汕嗰邊嗰啲，數到方言Rap，一定係蜀國嗰邊，潮汕、廣東甚至去到新彊都有。蒙古Hip Hop都好勁，自成一格㗎！同埋佢哋有啲交雜得好癲㗎！新彊維吾爾嗰邊會用幾種語言Freestyle，一定有英文啦，國語、地區方言、甚至維吾爾語！」
Heyo咁講，大家會唔會將節目入面嘅Rapper幻想成三國武將，MC Jin係呂布，PG One係趙雲，艾福杰尼係許褚，鬼卞係張角等等，淨係FF下都過癮，而每次Battle就好似佢哋征戰沙場一樣！
Heyo將會打入內地？
Heyo又補充一句：「所以中國個Hip Hop會好亂，一定會經歷一個好混沌嘅時期，所以就要趁亂！」這一句難道意味着Heyo已經有計劃進軍內地市場？
Heyo表示：「呢個一定要！因為香港搞音樂本身已經好困難，個市場唔係好大，同埋香港音樂不斷地『內耗』緊，你一定要去將香港嘅音樂變番大個market去打周邊嘅地區。中國亦係一個周邊地區，為咗香港音樂好係應該將佢發揚開去，俾更多人聽到香港嘅聲音。」
要打入內地又會面對不同的問題，除此之外Heyo還有甚麼大計？想知更多記得留意下一篇報道！
話時話，咩係Freestyle？
到底咩係Freestyle？
人人都講「你有Freestyle嗎？」到底甚麼才算Freestyle，與數白欖又有何分別？
Heyo話：「數白欖係正拍嘢，Hip Hop係非正拍嘢。用16分音符去數，一拍有4下，『1 、e、 n、 a』，數白欖就係正拍個『1』去入，Hip Hop就會喺『e、 n、 a』位入，『e、 n、 a』收，或者正拍收都冇所謂，簡單講就係Rap比起數白欖嘅節奏更講究。而Freestyle係其中一個techniqe，好考你點樣即刻set punchline，一個練習嘅方法。」
點樣去評論一段Rap？
Heyo話：「首先，個Flow嘅變化啦，會唔會加入啲melodic(旋律性)嘅嘢啦，因為有啲Rap來來去去得兩、三粒音，更加『說唱』。再者有冇畫面啦，歌詞令人一聽完會覺得『嘩！我睇到你講緊嘅嘢喎！』可以啟動到個聯覺。Punchline係畫龍點精嘅位，可能係同周遭環境有關。」