【任噏樂評】《中國有嘻哈》變速配節目 Freestyle係冧女絕招?

撰文:
最後更新日期:

《中國有嘻哈》去到第5集,Hip Hop Man去留亦終於揭曉,答案當然係有得留低啦,記住一句說話「一切都是套路」。

「套路」又點止咁少?同HipHop Man battle嘅雙胞胎組合OBi & MO3,於節目尾聲敗部復活成功,唔知過幾集會唔會又整多次「復仇Battle」,然後吳亦凡再講多次「真的很難選,太難了!」而且今集加咗啲「曖昧」元素落去,令到有兩pair參賽者好似螢幕情侶咁。

唔知打後吳亦凡仲會爆咩金句?

今集新金句「緣份就是這樣開始的!」

內地HipHop團體「紅花會」的大熱Rapper「PG One萬磁王」於今集與女Rapper「Yamy」battle,節目中回顧前幾集片段時,參賽者見到佢哋兩個要battle都大叫「結婚!結婚!」,沖淡一下節目嘅火藥味。

PG One同Yamy真係好合拍。

PG One同Yamy一齊造歌嗰陣,PG One都遷就晒Yamy嘅口味,曲風要funky就畀funky,要old school就畀old school,就連Yamy都對住鏡頭甜笑大讚「這個男生不錯!」兩人同台一啲都冇battle嘅感覺,而且答問題一齊天然呆真係夠晒可愛。

就連發呆都要一齊你眼望我眼。

除咗PG One同Yamy呢一對,仲有Bridge同女Rapper二毛,佢哋嘅「情愫」真係出晒面,兩人合作寫一首Hip Hop情歌,潘瑋柏都話「談戀愛!談戀愛!」兩人準備對陣時,張震嶽都忍唔住問:「你們這首寫的是情歌嗎?」然後Brige就解畫話兩人商量完要寫一首成都女與重慶男耍花槍的歌,甜一點的歌曲,潘瑋柏都忍唔住講一句:「緣份就是這樣開始!」MC HotDog都話呢一組就好似係情場老手想追情竇初開嘅少女一樣。其實回顧片段嗰陣,Bridge已經有錫二毛隻手,又話「然後一起」,充滿暗示咁款。Battle完二毛仲要攬住Bridge話:「我想哭」,Bridge又俾佢拎住象徵勝出嘅「R!CH」帽,唔通真係有啲嘢?

另外,張震嶽又喺節目中段爆Yamy係MC HotDog杯茶,而MC HotDog又爆潘瑋柏最近有拖拍。

雖然節目名叫《中國有嘻哈》,不過大家當作一個綜藝節目去睇心理會平衡啲,當係一個認真音樂去睇就一定會有落差。一個綜藝節目如果冇節目效果你都唔會追去啦係咪?MC Jin化身「HipHop Man」係一個效果,上一集講MC Jin要俾人淘汰又係一個效果,評判之間有矛盾係咁講「很難選」又係一個效果,今集營造到參賽者「互生情愫」又係一個效果,只係估唔到咁快就灑鹽花啫。除咗要記住「一切都是套路」,仲要記住集嘅新金句:「緣份就是這樣開始!」

媽呀!我已經分唔到係睇緊《中國有嘻哈》定係《中國有速配》!

前幾集Bridge已經借啲意錫二毛隻手。

Battle完攬攬。

返到後台再攬。

今集《中國有嘻哈》仲有好多精彩鏡頭㗎!(點擊放大)
+22
+21
+20


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。