【專訪】有機會要返內地發展? 本地Rapper Heyo:唔好故步自封

撰文:黃浩晉
出版:更新:

本地Rapper Heyo堅持玩Hip Hop十年,對於近日因為《中國有嘻哈》Hip Hop再次被炒熱,他的態度依舊:「對我嚟講Hip Hop唔係潮流。」既然Hip Hop音樂於內地突然受到主流觀眾注視,Heyo認為有機會就要到內地發展,而且香港音樂不斷地「內耗」,藉機到周邊地方繼續發揚香港的聲音。
攝影:黃國立

唔怕「被禁聲」?

Hip Hop的態度就是「有嗰句講嗰句」,但要到內地發展大部人第一時就會聯想到掣肘處處,「被禁聲」等等,Heyo卻不太擔心:「睇你點講啦,向來中國嘅詩人都係隱晦啲嘛,中國呢個土地係啲咁嘅養分,出嚟嘅嘢就係咁。再講,都係睇你點樣去表達同包裝入面嘅message。向來歷史都有好多,例如攝張紙仔落個包都係一個方法。有啲嘢要講就要講,因為想講吖嘛,但係睇你點講㗎啫!」

於上一篇報道,Heyo形容《中國有嘻哈》似三國一樣,而且認為中國的Hip Hop會經歷一段混沌的時期,要「趁亂」發圍。那Heyo會否轉型Rap國語?
Heyo卻認為:「呢個關生活事,如果我真係多咗機會上去生活,咁我自然會用啲國語啦。咁我國語咪自然會熟啲,自然有嘢會同國語族群講嘢,我會睇下我想講啲咩嘢然後去決定用咩語言;會決定個受眾先再決定語言。」

Heyo認為「有啲嘢要講就要講」

「揮動緊一面我哋群體嘅旗幟」

既然生活體驗會影響Rap的語言和內容,Heyo會否計劃到內地生活一段時間?他表示:「睇機會啦,因為你唔去搵佢,佢都會嚟搵你,呢個咪就係香港嘅狀況。就算我淨係想做好廣東話啫,但係國語仍然會攻過嚟,咁點解唔主動啲呢?咁我哋都可㗎嘛!佢哋又唔係唔俾我返去,咁咪返去,又講啲嘢俾你聽,講啲感受俾你聽囉!唔好故步自封最緊要!」

Heyo又講到:「賺外匯吖嘛!因為香港嘅樂壇太內耗,唔好淨係話中國,台灣、馬來西亞我都要打(入),甚至其他有華人嘅地方我都要打。」Heyo續道:「舊時廣東話喺所有唐人街可以用,但係依家好似貶咗一貶喎,全部人都講普通話;但係入面啲公公婆婆都係講緊廣東話,證明仲有一條線牽引喺到,咁我哋就要做啲嘢突顯番我哋文化嘅寶貴,如果唔係呢個文化就冇㗎喇。」

Heyo認真地說:「要話俾佢哋聽,我哋都仲係好有價值。其實Hip Hop都好講社區性,我哋係揮動緊一面我哋群體嘅旗幟!」

Heyo。

相隔10年的Call and Response

Heyo堅持10年,於上年推出首張個人大碟《花華》,而上月尾才推出《盛夏的舞》MV,Heyo表示接下來的時間正籌備其他歌曲的MV。雖然新MV對樂迷來說的是驚喜,但始終最期待還是希望聽到新歌。Heyo透露正準備將09年寫的舊歌《走》重新編曲:「嗰陣2字頭啱啱玩Hip Hop,首歌寫點樣睇自己,覺得Hip Hop係咩,寫低咗當時嘅態度。到依家重新編過首歌,同10年前嘅自己作回應,以前睇嘅嘢係對未來嘅揣測,依家去到呢個位聽番啲詞會覺得『唔係咁㗎喎!』,睇番以前嘅揣測有啲偏差,點解會形成㗎呢?我依家要點樣看待,點樣去修正。」

Heyo透露正準備將10年前寫下的舊歌《走》重新編曲,回應10年的自己。

《喜愛射毛》=《悼鵑》?

相信有不少人認識Heyo都是因為《喜愛射毛》一曲,歌詞、曲風、MV講夜蒲生活非常「上腦」,事隔幾年再回望這首歌,Heyo認為是一個成展的路口:「《喜愛射毛》係一個成長嘅路口,因為我完成咗樣嘢,我可以好口沒遮攔,可以講到一種反諷,寫party歌去反諷party;首歌聽落好hyper,但係歌詞講緊我唔係好鍾意party,亦講緊party現況係點。」

「同埋當時出《喜愛射毛》係想衝擊班衛道之士,好虛偽嗰班人,我就係好真實咁呈現落去party咪就係囉!你哋唔使再猜測夜蒲係點喇,個音樂就係咁『Boom Boom Boom』,同時間就好似歌詞就係好頹廢,所以首歌好錯配㗎!曲風好hyper再配以一啲好頹廢好嘲諷嘅meaning,我就係唔鍾意嗰種偽善。」

「跟住『哦,你哋唔鍾意吖嘛』同一個題材我就用啲詩情畫意去包裝,就有《悼鵑》呢首歌,其實兩個故事想講嘅嘢係一樣,但係後尾我發現佢哋都唔care嘅,但係我對自己有一個交代。即使你唔鍾意hyper好低俗嘅風格,我包裝到有詩意我都寫到!」

同樣以「夜蒲」作主題,無論係低俗直白,定係用意境包裝,Heyo發現原來其他人都唔care。
唔知大家聽完呢兩首歌有咩諗法?