陳奕迅開Live吐苦水 不滿被叫「情歌之王」:好虛無飄渺咁

撰文:
最後更新日期:

陳奕迅Eason即將於10月推出國語專輯《C'mon in》,昨日記者會已宣佈會在全球18個地方舉行音樂會宣傳新碟,而香港站門票索價750元今朝一開賣已售罄,黃牛飛價錢更炒至近4500元,Eason果然是「神」。

宣傳攻勢一浪接一浪,Eason今日fb開live,化身來自東莞的「陳相士」為大家求籤抽歌詞解籤,解答網民問題。Eason有名你叫「吹神」,用歌詞解籤當然冇難度。

世事真係「啱啱遇着剛剛」,有些籤文與網民問題perfect match,例如:有網民指自己音準差歌聲難聽,但想投身音樂相關行業;結果,Eason為他抽出《淘汰》,就連Eason都忍唔住話:「緣份呢啲嘢真係好難講!」鏡頭後的工作人員也忍俊不禁。不過Eason都兜到:「唔使跟住個大隊去走,咁可能會殺出一條新血路,你睇下陳奕迅都紅到,有咩係冇可能發生呀!當年俾人話我其貌不揚,我一直都唔信,所以要做番自己!」又有網民問「喺街見到你可唔可以錫你?」,Eason則抽出《今天只做一件事》,想不到籤文如此吻合。

不過開Live途中Eason都有解不通的歌詞,有些歌詞他也不曾仔細研究,笑言:「不如依家打俾林夕咯!」

Eason化身來自東莞的「陳相士」,為網民解籤。(陳奕迅facebook截圖)

有網民留言指Eason扮相士非常神似,工作人員問Eason對此有何感覺時,Eason卻拉到去日前記者會的事,吹神功力果然非同凡響。Eason話:「有個台灣傳媒問我,好似唔係好gur個唱歌節目用『情歌之王』去介紹你,而周杰倫就叫『嘻哈鼻祖』好似好勁咁,點解我係『情歌之王』好虛無飄渺咁,好多人都係情歌之王啦!我覺得唔係好掂!」

Eason又繼續話:「周董叫我『K歌之王』都好體貼㗎喇,但係有點兒太俗套喇!所以我噚日有個結論,『百變』係屬於梅艷芳,咁我可唔可以係『善變』呢?我係『善變之王』!係咪正好多呀!」

有啲籤文同網民問題撞到應一應,Eason都忍唔住笑。(陳奕迅facebook截圖)

最後Eason為自己求籤又有神奇事發生,當Eason手放在《不來也不去》籤文上,果然真的求到《不來也不去》,Eason都驚嘆:「嘩!好啱我呀!」事後Eason又爆seed:「依家好多時要話俾人聽『係真㗎!』,其實你信就信,唔信就算啦,你可以話我做戲!」

Eason話嫌「K歌之王」太俗套,「善變之王」正好多。

以下片段轉自陳奕迅Facebook(點擊重溫)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。