G.E.M.第5次踏紅館舞台憶往事 「畀心愛嘅人傷害令我好心傷」
G.E.M.《Queen of Hearts世界巡迴演唱會》香港站昨晚於紅館完成首晚演出，除了大熱作品《泡沫》、《光年之外》、《A.I.N.Y.》等，亦有不少改編作品，包括改編《Eyes Nose Lips》的《紅薔薇白玫瑰》、《約定》、《讓我跟你走》、《每天愛你多一些》等等。
作為實力派歌手，G.E.M.在演唱會中也是多唱歌，少說話，讓樂迷一飽耳褔。演唱會來到下半場，身穿一襲白色長裙的G.E.M.終於有返啲女神feel，她更分享了一個故事：「今晚主題係《Queen of Hearts》，不如分享一下關於愛嘅故事。我對愛有一個好不切實際嘅幻想，就係要日日好似拍戲咁，要轟轟烈烈、山盟海誓，但到大個真係拍拖嘅時候，就會發現愛唔係咁樣，有一段時間我係好心傷，尤其係當你畀心愛嘅人傷害，付出好多嘢但最後徒勞無功，如果你未試過，我恭喜你，你好快會嘗試到呢種滋味。有一首歌我早兩年作嘅時候無諗咁多，最近聽返我諗起我公公，公公以前每次嚟香港都會同婆婆一齊嚟，但婆婆喺6年前走咗，我就喺度諗，到底公公呢6年係點㗎呢？我問起佢，佢就話淨係諗婆婆好嘅嘢囉，鬧佢嗰啲佢唔諗㗎。我望住公公嘅眼神就明白，原來真係愛一個人嘅時候，佢唔需要經常喺你身邊，但無論佢喺幾遠嘅地方，你心目中永遠都會留低佢好嗰一面。」然後便唱出《多遠也要在一起》。
唱完《多遠也要在一起》後，一位男粉絲為G.E.M.送上108支紅白玫瑰，嚇得她當場反應不來，更一度以為男粉絲想讓她把玫瑰轉送給其他女生。G.E.M.禁不着問：「咁你呢紮花係做咩㗎？真係送畀我㗎？」男粉絲則示意向G.E.M.求婚，G.E.M.既驚且喜說道：「我咁大個女都係第一次畀人求婚，我呢一刻都唔知要畀啲咩反應好。」男粉絲隨即送上一個粉紅色箱，工作人員幫G.E.M.打開時，她緊張得大叫：「呢個要留畀我開㗎！」並謂：「到底會係咩嚟呢？唔通係冰皮月餅？」打開箱蓋，看見紅色一團，不少觀眾大叫：「婚紗！」不過原來是迎合《Queen of Hearts》主題的紅裙，胸口位置更是開得相當「疏爽」，令全場觀眾拍掌叫好。而G.E.M.則尷尬表示：「多謝你，我今晚返去會好好考慮一下你嘅要求。」
除了有華麗的鋼琴自彈自唱外，G.E.M.更排出一套氣勢十足的鼓，功架十足的獨奏了一段。快歌時段開始，《新的心跳》、《See You Again》在重新編曲下相當Groovy。最後G.E.M.更以一段《Get Everybody Moving》介紹幕後團隊，包括Lupo Groinig在內的樂隊成員全是外國樂手，編曲絕對有國際水準，實在要讚。不過才剛High起來，G.E.M.便與觀眾道別。
可能你會話：「吓？咁就完㗎啦？真係得一首自家嘅廣東歌唔夠喉喎？」阿G.E.M.實在非當鬼馬，原來她把大部分廣東歌也放在Encore位置，聽到《Where Did U Go》、《All About You》，終於有一種G.E.M.演唱會正式開始的感覺！最後都總算交足貨《喜歡你》、《睡公主》、《有心人》，一連串廣東作品實在係令香港樂迷回憶返晒嚟！G.E.M.在完場時感觸道：「我已經係第5次喺紅館開演唱會，我喺呢個舞台上面經歷過好多嘢，我試過呢頭失戀另一頭喺呢度開騷，我試過第一次有1萬人同我喺呢度一齊祈禱。有一個人我一定要趁今日嘅機會去多謝，因為佢令當日嘅睡公主成長為今日嘅Queen of Hearts，多謝呢位King of Hearts，我嘅上帝。」