【獨自音樂】公司嫌歌曲不夠商業 陳奐仁:我個樣唔夠商業就真

撰文:
最後更新日期:

相信沒有人會懷疑創作歌手陳奐仁的音樂才華。這位音樂人曾經與多位天皇巨星合作。作曲、填詞、唱歌、以至自彈自唱也備受肯定,而且他也曾成為多個大型歌唱節目的導師、又在香港開紅館個唱。雖然他做過很多歌手夢寐以求的事情,也具備了成為一線歌手的實力,但始終定位不如其他天皇級歌手。對於自己處於這個尷尬位置,陳奐仁以「我個樣唔夠商業」來形容自己!

攝影:謝浩然

陳奐仁曾因「個樣唔夠商業」、「音樂唔夠商業」為由被拒絕出唱片。(攝:謝浩然)

歌手陳奐仁(Hanjin)來自新加坡,他是一位能夠作曲、填詞、編曲及監製的全能音樂人。在1999年,因得到歌神張學友賞識而為他創作《和好不如初》、《愛你痛到不知痛》及《女人香》等經典歌曲。其後他又曾與鄭中基、陳奕迅(Eason)、鄭秀文、陳冠希、陳小春、容祖兒等合作。雖然入行不久便有機會與多位歌手合作,但對於一直希望成為歌手的Hanjin來說並沒有快人一步。

「好多人都同我講話好欣賞我,對我評價好高,但係好多時行動上不成正比。其實我出道到依家只係一個目標,就係上一個大啲嘅舞台,仲有就係出唱片。18年前嘅我,寫咗好多歌,當時我周圍去sell唱片公司,點知佢哋全部都拒絕我。」陳奐仁說。

Hanjin續說:「簡單一個結論就係『我個樣唔夠商業』、『我嘅音樂唔夠商業』。不過到我成名嘅時候就開始唔同,佢哋雖然都係唔想幫我出碟,但係想將我啲歌留畀佢哋嘅歌手去唱。雖然係咁,但起碼我知道其實陳奐仁嘅音樂其實係有價值,只係我個樣無商業價值。」

Hanjin坦承《愛是懷疑》為他帶來了不少工作的機會。(攝:謝浩然)

+17
+17
+17

有很多人認為香港都是以「商業歌」為主導,這也是其中一個原因令樂壇曲風感覺變得單一。對此,陳奐仁直認為商業歌打工多年:「作為一個音樂人,我的確有幾首作品改變咗我嘅音樂路。第一首就係幫歌神張學友作嘅《和好不如初》,呢首歌到現時為止佢嘅演唱會都仲唱緊。至於另外就係Eason嘅《愛是懷疑》、《阿斯匹靈》、《Because You’re Good To Me》、《冤家》及《我也不會這樣做》呢5首歌,因為當時係我第一次有人肯搵我做監製。我記得當年做完《愛是懷疑》之後好幸運,好多人搵我做監製。而且我成日收到唔同唱片公司打電話搵我,要求我寫一首《愛是懷疑》,因為佢哋都想要《愛是懷疑》帶出嚟嘅效果。呢個就係帶出咗樂壇對商業歌嘅要求,而我過去呢十幾年就係為咗呢啲要求而服務。」

Hanjin新歌《你最美麗》是一首為老婆而作的情歌。(攝:謝浩然)

Hanjin不經不覺在樂壇打拚多年,對他來說能否大紅大紫已經不重要,要他總結自己過去18年的努力,他似乎也相當滿足:「有知音人永遠係一件開心事,但我覺得一個歌手上唔上到位,永遠都係睇佢嘅老闆覺得喺你身上賺唔賺到錢,如果佢覺得佢賺到自然會幫你。而我都開過紅館演唱會,喺國外做過tour,已經算好好㗎啦。」

Hanjin為別人「服務」多年,近年他終於有新的想法。在音樂上他希望可以自私一點,把自己的人生想法呈現出來。「我同過咁多歌手合作,我依家最想合作嘅歌手係『陳奐仁』。因為佢(自己)已經出道差不多二十年,好想再開演唱會,創作一啲可以表達自己想法嘅作品。」

Hanjin坦言:「我忽略咗自己好多年,依家嘅我寫每一歌嘅故事都係由心而發,唔會再特登為客而做。以前自己因為有欲望,為自己帶來好多壓力同埋執著。有好多工作上嘅挫折其實都係因自己而來,所以我想做自己。」

陳奐仁的新歌《愛的力量》是陳奕迅《愛是懷疑》的下集。(攝:謝浩然)

如果大家有留意Hanjin的作品,你會想起他與陳冠希合作時期做過多首Hip Hop歌首,如《香港地》、《戰爭》。隨著Hip Hop熱潮流行,Hanjin也推出了數碼EP《Rap One》,不久的將來還會推出實體大碟:「之前因為要搬錄音室,搬完之後,當我整理電腦嘅時候,就搵到一啲以前寫嘅beats,呢啲beats都係只有編曲無Melody。後來我發現幾好,於是我用呢啲beats做咗20首rap歌交畀發行人。後來佢哋同我講叫我唔好出rap歌,因為喺市場上好冷門,佢哋想我做一啲singer song writer路線嘅歌曲,於是我就做咗7至8首rock嘅歌曲。

跟住隨著節目《中國有嘻哈》hit爆,我仲以大魔王身份上節目唱歌,發行人就同我講不如出rap歌,結果我太太就喺之前交出嚟嗰20首歌入面選5首出黎做數碼EP《Rap One》,而之後即將推出嘅《Rap Two》將會加埋《Rap One》嘅歌曲出一張以人生為主題嘅大碟叫《Love Is Pain》。」

《你最美麗》其實是Hanjin答應太太為她而寫的歌曲,雖然這個承諾已是多年前的事,不過今年Hanjin終於有機會把歌曲寫好面世,訴說對太太的愛。


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。