張敬軒深夜開Live放催淚彈 為患癌歌迷集氣:音樂係佢止痛劑!

撰文:
最後更新日期:

張敬軒昨日擔任陳柏宇紅館個唱嘉賓,兩位「行走的CD」合唱《騷靈情歌》為樂迷送上驚喜,而軒仔亦有獨唱《櫻花樹下》,令各位入場的樂迷都大飽耳福。看來軒仔知道大家意猶未盡,昨夜做完嘉賓回家再開Live,除了唱出樂迷的點唱歌,又與大家分享心中的想法,來一個深夜pillow talk。

昨晚軒仔開Live有求必應,唱出《念親恩》、《寂寞的男人》、《傻女》、《塵埃落定》、《披星戴月》、《偏偏喜歡你》等等歌曲後,軒仔再與大家分享一些心事:「人一到夜晚就好脆弱,千愁萬緒。」

軒仔昨晚做完陳柏宇演唱會嘉賓返到屋企再開live。

軒仔眼濕濕地提到今年是不容易過的一年,先是年頭發生一段小插曲(《我是歌手》事件),加上家中寵物抱病及離世,令他工作狀態不太好。軒仔話:「希望大家原諒我一啲演出、工作唔狀態唔好,因為喺我屋企小動物同人係平等嘅。可能對一啲人嚟講只係一隻狗仔病咗,但對我嚟講佢係屋企人。」

軒仔又提到照顧家中寵物時投放了很多心力:「我隻貓女離開之後,到我隻狗仔唔行得,由最初諗住點都要救番佢,試咗好多方法同用好多藥,由仲有一絲希望,到醫生話佢唔會再企番起身,過程中經歷咗好多情感。」憶述家中寵物抱病時軒仔都一臉愁容。

軒仔在台上受樂迷擁戴,但他所面對的困擾只有他自己才知道。(資料圖片)

除了寵物身體抱恙,年頭發生的《我是歌手》事件令軒仔與家人很大困擾,令他感觸地說:「你哋冇辦法想像我父母嗰陣時面對嘅困擾,作為公眾人物有好多時福係自己享,榮耀係自己攞嘅,但係唔好嘅事情都係屋企人去承受。有啲新聞我哋識得去拆,識得去回答,但係佢哋唔識。」加上軒仔父母在廣州居住,要面對的問題不比軒仔少:「特別佢哋住喺廣州,一啲八卦雜誌用嘅字眼比香港嘅雜誌更難睇,更加harsh;我一有新聞嗰陣,佢哋要面對其他人點樣睇佢哋。」

家人及寵物以外,還有一位患癌歌迷的經歷令軒仔感觸良多,他以「震撼」來形容:「最近我有位經常見面嘅朋友,佢係我一位歌迷,因為癌症要截肢、接受化療,我有同佢見面,一齊唱下歌練下歌,最近同佢相處係好震撼。」

軒仔續道:「通過同呢個男仔相處,我發現生命當中有更多比post一個instagram或者上社交網站更重要嘅事去做。佢嚟過我錄音室兩次,見到佢對音樂嘅熱誠係好震撼,佢媽咪話佢全身都好痛;但係佢一入到錄音室,一開咪唱歌,每次問佢有冇唔舒服,佢都話冇問題。」軒仔眼泛淚光話:「對於我喺呢個行業入面做咗咁耐嘅人,有時音樂已經係一份工作,但係音樂對於佢嚟係嗎啡,係佢嘅止痛劑!當佢辛苦唔舒服嘅時候,只有唱歌同音樂可以幫到佢。」軒仔更呼籲昨晚睇live的4千多位觀眾能為這男孩祈禱。

軒仔希望昨晚一同睇live的觀眾能為那位患癌的歌迷祈禱。(fb live截圖)

雖然軒仔這一年面對各方面的挫折,但傷痛過後他視之為寶貴的一課:「雖然今年去唔成外國讀書,但係都上咗好多寶貴嘅一課。好感恩當一啲門關起咗,另一啲門會打開,透過認識不同嘅人學到新嘢;事情過後會更明白自己要堅持咩嘢。其實我哋都係普通人,都會傷心、寂寞,同你哋嘅感受都一樣。不過我更加搵到我嘅價值,就係做多啲可以打動人心嘅歌,可以陪住你哋渡過生活上嘅難關。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。