【任噏樂評】十大中文金曲頒獎禮求其過亞視 周國豐:係資源問題

撰文:
最後更新日期:

今年香港樂壇頒獎禮大執位,新城由Boxing Day拆禮物日改做29號,TVB勁歌總選竟然提早到12月30號,得叱咤無變過照舊1月1日。最大改動反而係港台,提早到12月17號就進行頒獎儀式,今年《十大中文金曲》以《金曲40我和你》作主題,慶祝頒獎典禮踏入第40屆,更加分拆成「頒獎典禮」同2018年1月4號舉辦嘅《我和你音樂會》兩部份。不過得意在昨日咁大個頒獎禮,冇乜街外人知都算,連港台有屬於自己嘅電視頻道都唔搞視像直播,令人感覺上比亞視更求其。

昨日舉行的《第40屆十大中文金曲頒獎典禮》雖然好多歌手撐場,不過偏偏就冇視像直播。 (陳順禎攝)

+15
+14
+13

今年頒獎典禮大規模縮細,在大專院校的禮堂舉辦,仲要喺下午2點舉行,講真句,我唔講你事前又知唔知?頒獎禮上只進行頒獎,而沒有唱歌的部份。一個頒獎典禮最緊要係咩?係睇唱歌!一個唔唱歌嘅頒獎典禮,就好似麥旋風冇旋風、媽咪麵冇媽咪、BB油冇BB咁,即係點?即係我都唔知講乜好。對歌手嚟講,可能呢個並唔係一個大問題,始終得獎都係一個嘉許,只要有獎攞都係開心事。不過對於喺收音機聽直播嘅觀眾嚟講,一個齋噏唔唱嘅頒獎禮,分分鐘難捱過睇足全晚《新城勁爆頒獎禮》。而喺冇歌唱嘅情況下,頒獎禮亦草草在不足兩小時內結束,離場時不少人問:「吓?完咗啦?」

個個歌手攞完獎就走,歌都冇得唱。聽電台直播嘅聽眾應該都幾難受。 (陳順禎攝)

更荒誕是,在每個人拿着手機也能高清直播的年代,擁有兩條電視頻道的香港電台,竟然連自己的年度大事也沒有進行電視及網上直播,反而在下午3點半,頒獎禮最緊張的大獎時刻,港台31台竟然重播《第14屆十大中文金曲頒獎典禮》,雖然我明白近日31台也在重溫過去多年的頒獎禮,不過打開電視機看到如此情況,深信唔少觀眾都有種時光倒流20年的感覺。試想像,當你打開電視打算睇吓有冇頒獎禮直播,結果一轉去31台就見到梅姐及羅文得獎,到底係咩感覺?此情此景,可媲美亞視重播亞姐競選,甚至12年前煙花匯演。歲月留聲台也終於有接班人。

頒獎禮正日唔做直播都算,電視竟然選擇重播《第14屆十大中文金曲》,媽好亂呀! (網絡圖片)

面對如此情景,《香港01》訪問香港電台總監(電台) 周國豐,他表示:「其實過往在《第30屆十大中文金曲頒獎典禮》也是同樣做法,把頒獎典禮及音樂會分開。因為今年難得40周年,有太多訊息想透過音樂會與樂迷分享,如果再加入頒獎典禮的環節,恐怕演出時間會過長。」做法變複雜,資源及人力分配上難免會遇上問題,他坦言:「資源分配的確係大問題,今次分開兩個活動去回顧樂壇,經費上亦較昂貴,唯有早在8月已開始以不同形式作宣傳。」不少人會覺得,近年樂壇頒獎禮有種倒退現象,便是放棄視頻直播,包括新城過去兩年的《勁爆》,以及昨日港台的《十大中文金曲》,周國豐認為:「都係資源問題,因為我哋今年做兩個活動,唯有用節儉嘅方式,將今日頒獎禮嘅精采場面拍低剪輯,之後喺電視節目中會播放。而重點則放在1月的音樂會,到時電台、電視及網上也會有視像直播。」

香港電台總監(電台)周國豐解釋,今次頒獎禮冇電視直播,係資源問題。

正當網上大趨勢也是認為香港樂壇逐漸末落時,今次港台做法,難免讓人覺得連頒獎禮也不被重視,周國豐解釋:「其實去到1月4號個音樂會嘅時候,大家就會明,點解我哋會將一啲訊息透過音樂會傳遞。回顧一年樂壇動向係重要,不過我哋今年覺得更需要帶出一點,其實而家好多新歌手都有實力,所以更需要適合平台去俾佢哋表演。至於你話頒獎禮重要性係咪低咗,其實1月4號當日都有幾個大獎會頒發,反而我哋分拆成兩個活動,可以拉長事件嘅關注度,從而達到我哋心目中,回顧、展望兩個要點。不過當然每件事都無一個完美嘅處理方法,所以最後大家都覺得今次嘅做法相對上係最好。

問到昨日的大贏家李克勤,他則認為今次港台做法沒太大問題。 (陳順禎攝)

問到頒獎禮上的大贏家李克勤,他以內地情況作比較:「今年港台分開兩次頒獎,我覺得冇乜所謂。家有家規,國有國法。佢哋今年40周年,所以分開今日(12月17日)頒獎,1月4日唱歌。另外仲有一啲大獎會喺1月4日先頒。其實對於歌手嚟講呢個安排影響唔大,而家內地頒獎禮有時都會係咁,晏晝先頒獎,夜晚先唱歌,可能我已經習慣咗,所以我又唔覺得有咩問題。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。