【勁多金曲自私選】「最多人翻唱主題曲」　ToNick呢首歌要記實！

來到2017年尾，各大樂壇頒獎典禮舉行在即，如果是10年前，這大概是大家也相當期待的事。不過近年，香港樂壇頒獎禮每況愈下，連樂迷也話要罷睇，甚至部份音樂人亦批評香港當今的頒獎禮欠缺公信力，有歌手指出自己曾經年年派歌，也不乏大熱歌曲，偏偏電台唔播，頒獎禮也不獲邀請出席。與其每年也頒發偽公平的獎項，倒不如直接一點，所以01音樂今年決定首次舉行《勁多金曲自私選》頒發樂壇獎項，而這幾個獎項，完全是心水自私選，沒有任何投票過程，亦坦白說毫無公信力。要說公信力的話，看過獎項的你，同意便點個讚，不同意便Click嬲嬲，認受與否，任憑看官定論。

「今年最多人翻唱主題曲」

得獎者：ToNick《長相廝守》

「難道我可以扭轉宿命　重遇你一次」淨係睇呢句歌詞，你都識唱埋落去啦！冇錯，呢首就係樂隊ToNick今年爆紅嘅歌曲《長相廝守》，亦係電影《救殭清道夫》嘅主題曲。相信有睇套戲嘅網民一聽到呢段旋律，腦海即刻泛起Babyjohn同林明禎對戲嘅種種畫面；同時呢首歌唱到街知巷聞唱K有人唱，busking又聽到人唱，YouTube又有好多人翻唱，「今年最多人翻唱主題曲」呢個獎真係實至名歸。

數數手指，ToNick都已經成軍10年，一隊樂隊能夠齊人走到今日的確得來不易；加上外界總會以「地下」、「獨立」、「非主流」等等字眼去形容樂隊音樂，其實音樂類型真的不用分那麼細，最重要是歌曲帶出的訊息，製作上是有心機的誠意之作就足夠。《長相廝守》一曲爆紅，令ToNick登上主流頒獎禮的舞台，早前港台十大中文金曲，更與Supper Moment同台得獎，兩隊一起出道的兄弟Band終於打破外界定型，實在對至今仍然堅持的眾多樂隊非常鼓舞。

ToNick今個月在九展開騷，全場企位都座無虛席，對於第一次踏足3000人舞台，鼓手晨曦在台上感觸話：「我哋卡住喺1000人9年喇！」的確，樂隊在香港發展有一定難度，但正如ToNick的歌詞「左計右計　諗到腎虧　齋講無用　發你個夢」《發你個夢》、「到最尾再睇下最初 起碼我做過」《T.O.N.I.C.K》等等。最重要是堅持自己的夢想，踏出第一步，起碼我做過。