【專訪】一種米養百樣人 樂隊逆流《亂世。說》用五首歌講一件事
相信大家看過上一篇專訪後，對重型樂隊逆流有了一定認識。尤其明白到主音傑佬從事殯儀、Bass手阿Ken從事獸醫助護，對生死有另一番體會，才衍生出逆流帶文學味道的歌詞，談及「緣起緣滅」，以「花開花落」的意象形容聚散等等。事隔三年，逆流推出第二張專輯《亂世。說》，到底這次向聽眾帶出甚麼訊息？
攝影：陳順禎
逆流將於本月27日舉行《亂世。說》音樂會，繼首張專輯《續世。說》後，推出第二張專輯《亂世。說》，主音傑佬如此形容新舊專輯：「《續世。說》係一個序章，包含一啲對社會嘅諗法，一啲生活哲學，以及對周遭事情嘅抒發；而《亂世。說》係描述緊，一個晚上發生咗一件事，有5種帶有唔同想法嘅人，到底佢哋各自嘅狀態係點呢？係描述緊一個狀態，而唔係我睇到啲乜就寫出嚟要你去跟。」
鼓手阿燊補充：「面對社會時事，或者搭車望到咁嘅景象，會覺得唔健康，其實唔止香港，甚至全世界都唔發生緊咩事。但最後你係咪要跟網絡上言論，或者剪輯嘅片段去認知一樣嘢，咁點解你唔親身去理解呢件事？你可以以上嘅嘢當參考，但唔係最終嘅答案，你係要去搵答案。」
相關文章：
【專訪】殯儀、獸醫助護都玩Metal？ 樂隊逆流睇透生死創作音樂
【小劇透】《亂世。說》的五種狀態：
《六呎之下》
「形容 一個準備參與衝突嘅人，佢係預咗死，心入面係有一種佢認為嘅正義要去追隨，佢唔會怕失去生命嘅諗法。『未怕 埋葬六呎之下』」
《飛砂》
「雖然我哋身邊有好多嘢都控制唔到，覺得好無力，但係咪真係改變唔到呢？的確世界潮流、趨勢等等事情我哋控制唔到，但可以控制自己嘅心態，正面去解決問題。」
《留‧離‧破 》
「佢有一啲矛盾，佢想跟住前面嘅去衝嘅人。」
《皇》
「一個人好想搵到自己嘅烏托邦，好想成為自己嘅主宰。」
《毋忘我》
「社會中生活得好攰嘅人，到底點解會為咗生活唔見咗自己呢？提醒大家唔好唔見咗你自己。」同時亦係傑佬的寫照。(詳見上一篇報道)
新專輯《亂世。說》中，只有《毋忘我》一曲從未曝光，大家想聽就要等到音樂會當日聽Live，逆流各人異口同聲說：「呢隻歌好有驚喜，聽完毛毛管戙！」傑佬話：「有人話個編曲好似《別．離》，但又不盡然係，《毋忘我》多一種更歇斯底里嘅狀態，而且係逆流第一次喺歌曲加入澎湃嘅弦樂。」阿燊補充：「同埋有女聲和音，而且嗰位女Vocal錄音時係大住肚，個BB同佢一齊Scream，個畫面幾溫馨呀！」
大家睇完新碟簡介打咗個底，到音樂會正式聽Live時應該會更投入當中的情緒。除了歌曲用了新的敍事手法，新專輯錄音過程亦有不少趣事，逆流笑言今次錄音「俾人捽得好甘！」
今次《亂世。說》邀請了三位監製操刀，Adrian Chan、Wilson Chow及Kin@Insitinct of Sight，阿燊形容三位監製是「負責品嚐試菜」，大家互相溝通炮製最好的成品。傑佬補充這次尋找監製跳出了自己的comfort zone，他表示：「我哋跳出自己嘅comfort zone，因為幾位監製會係咁『捽』我哋，尤其係錯vocal嗰陣！」他續說：「Wilson講過一句『你污糟啲啦把聲，俾多啲氣聲我』，嗰時我就諗『咁我咪漏氣囉，點唱呢？』而Adrian又會話『你唔覺你咁唱好o靚仔咩？沙少少、厚啲啲』，但係我用唔慣嗰個位發聲會唔舒服，但係佢會話『啱㗎喇！唱Live同錄音係兩單嘢，你唱Live咁錄音咪唔detail囉！』後尾諗番，好似又有啲道理喎！」
雖然俾監製「係咁捽」，但逆流感激有他們的鞭策才令新專輯更成熟，阿燊話：「最緊要佢哋當我哋係friend，佢哋真係respect我哋嘅作品！佢哋大可以一句『幾好吖』就行開，同埋商業角度去講，我哋俾到幾多錢啫，真係好多謝佢哋！」
阿燊又話：「每次錄完音最重要係嗰餐宵夜，佢哋會講笑話『你次次交啲demo都咁複雜，你打鼓好叻咩？』你諗下如果佢哋同你唔friend會咁同你講咩？真係好開心大家friend到合作到，可以有傾有講做好件事。」
能夠同監製做到friend的確唔容易，最估唔到係監製們會唔瞓陪你癲，阿燊話：「我哋都會捽Mixing個期，有一次佢哋凌晨兩點幾交第一個mix，我覺得爭啲；之後4點幾再俾一個，我都係覺得個snare爭啲，6點幾佢再俾！嘩真係不得了！雖然我都係覺得爭啲，不過會同講『你瞓先啦！』好開心佢哋會咁做，因為大家都想個成品快啲俾到大家聽。」
睇完逆流講新碟錄音過程，相知大家終於明所有音樂人都會話唱片係心血結晶，更加明白每一張實體碟都別具意義。不過Band Sound現場演出都好重要，睇完Live再聽碟回味先至夠完整。不論你鍾意咩類型音樂都好，希望大家都會入場親身支持啦！