【專訪】重型音樂開始發圍? 樂隊Maniac:大眾眼中仲係奇裝異服

撰文:
最後更新日期:

本地獨立重型樂隊Maniac將於11月3日舉行新專輯《浪客行 The Sailors on A Sinking Boat》發佈音樂會,距離上一張專輯《記憶. 凌亂散落》已有7年時間,Maniac形容這7年過程經歷過驚濤駭浪,試過擱淺,但像歌曲一樣最尾會找到希望,造就今天大家聽到的《浪客行》。

Maniac由04年組成至今已經13年,成員各有正職,人越大生活擔子就越重,齊人夾Band寫歌的時間可說是一種奢侈,而且經歷過成員變動,對樂隊造成打擊。主音Jason表示:「2010年出完第一隻碟《記憶. 凌亂散落》,Keyboard手Jasper加入有好大input,好快寫好《意有所至而愛有所亡》呢首歌,但係到14年Jasper離隊,有接近兩年時間結他手Kit去咗上海工作,大家開始同步唔到,有諗過會唔會解散。」而且Bass手阿Mo正職是救護員,有家庭要照顧小朋友,曾經有一段時間要請其他樂手頂替演出。

樂隊Maniac將於11月3日舉行演唱會並推出新專輯《浪客行》。(黃國立攝)

快啲Click入去認下Maniac各位成員啦!(黃國立攝)
+6
+5
+4

近年重型音樂在主流平台的曝光率增加,是否代表重型音樂在香港開始抬頭?主音Jason卻認為,多人接觸到重型音樂不等同他們接受程度亦變高:「媒體報道係多咗,但係對聽開廣東歌嘅人嚟講,唱Scream嘅人喺佢哋眼中仍然係等於奇裝異服一樣。雖然多人接觸咗,但仍然好多人覺得重型音樂係奇怪嘅聲音。」他亦笑言:「就連我阿媽都問我,『你哋有冇啲歌係聽到歌詞㗎』,哈哈!」

雖然越來越多人接觸到重型音樂但不代表更多人接受,主音Jason形容Screan唱腔對一般聽眾來說是「奇裝異服」。(黃國立攝)

Maniac歌曲主題多變,如《意有所至而愛有所亡》引用《莊子》的故事,《人間失格》又令人聯想到太宰治的名著,到底這些靈感從何而來?會否怕訊息太深奧令人難以明白?

主音Jason表示:「音樂得意在聽眾聽到咩就係咩,每個人都有自己嘅解讀先係奇妙嘅地方,冇必要坦白地解釋晒歌曲嘅意思,夾硬要聽眾接受我嗰一套。」結他手Kit補充:「大家成日講『作者已死』,就好似中學要讀嘅文化篇章咁,考評局出嘅問題同答案又係咪作者想講嘅嘢呢?參透係一樣好複雜嘅嘢,解讀成點就留番俾聽眾。」

唔使每首歌都解釋得清清楚楚嘅,留返俾聽眾自己解讀仲過癮。(黃國立攝)

不單止重型樂隊,音樂人要出show本身都不是容易事,就連著名Live House Hidden Agenda早前都在facebook宣佈「安息」。演出場地難求,新樂隊難以累積經驗,結他手Kit形容:「少咗落場嘅機會,就好似足球員咁雪到凍晒。以前都有啲十人、廿人嘅騷大家玩得開開心心,依家真係冇。」

主音Jason提到他們曾另覓場地搞騷,不過掣肘處處:「今次我哋喺Musiczone開騷,但其實之前試過聯絡其他場地,但係對方回應話『我哋呢到搞過acoustic㗎,但都俾人投訴』,咁我哋更加唔使玩啦!」

樂隊演出場地難求,就好似球員冇得落場踢一樣。(黃國立攝)

Maniac新專輯請來國際著名音樂人Alex Newport及Ted Jensen操刀大碟後製,這次合作是如何促成?原來send個email就得!雖然online engineering很普及,但他們也花了很多時間尋覓合適的製作人,務求呈現出「最Maniac的聲音」。到收到製成品的一刻,各成員都大讚無可挑剔,也不懂去挑剔,在不同裝置播放的差別也不大,形容攞聲準確度非常高。

Maniac新專輯另一主打歌《一三》的MV由委內瑞拉藝術家Jennifer Medina執導,畫面感覺迷幻,在霓虹燈光的色調下,一名頭戴白紗的女生穿梭不同地方、不同人物之間,到底在表達甚麼訊息?原來歌詞及畫面都在講對建立家庭的不信任,來自主音Jason的經歷。

Jason表示:「有人會將個女仔解讀成邱比特,但其實佢係一個幻象,係一個自虐嘅想法,來自建立家庭嘅不信任,因為我嚟自一個單親家庭覺得建立家庭好難。」他補充:「人成日想建立家庭,就算喺一個不信任嘅情況下都要建立家庭,但明知係會衰都要中個頭落去,喺現代社會有幾多人家庭係完整?」

除了《一三》,還有其他歌曲的題材源自成員的親身經歷,如《獨白》寫下了Jason與阿Mo親人離世的心情,Jason憶述自己一邊填詞一邊落淚,雖然片言隻語未必能讓聽眾完全了解到當下的心情,但也希望聽眾能有所體會。

場地提供: Show Bros Rental Ltd

Maniac每首歌也寫下各成員的親身經歷。(黃國立攝)

+4
+3
+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。